هاوكات لەگەڵ یەكەم ساڵیادی خۆپیشاندانەكانی بەغدا و پارێزگاكانی دیكەی عیراق، مستەفا كازمی سەرۆك وەزیران رایگەیاند، حكومەتەكەی لەماوەی دەستبەكاربونیدا چەندین دۆسیەی گەورەی گەندەڵی ئاشكراكردوە.
بەیانی ئەمڕۆ گردبونەوەی هاووڵاتیانی ناڕازی لە عیراق دەستیپێكردوە و وەك خۆیان دەڵێن، پاش ساڵێك لە خۆپیشاندانەكان و كوژران و برینداربونی هەزاران كەس، هیچ گۆڕانكارییەكی جەوهەری روینەداوە.
هەروەها وتەبێژی فەرماندەی گشتی هێزە چەكدارەكانی عیراقیش داوا لە خۆپیشاندەران دەكات هاریكاری هێزە ئەمنییەكان بكەن و بە ئارامی گردبونەوەكانیان ئەنجامبدەن.
لەپەیامێكیشدا بەبۆنەی تێپەڕبونی ساڵێك بەسەر خۆپیشاندانەكانی 25ـی تشرین، شەوی رابردو مستەفا كازمی وتی “حكومەت داواكارییەكانی خۆپیشاندەرانی كردوەتە كارنامەی خۆی و لەو چوارچێوەشدا پرۆسەی هەڵبژاردنی پێشوەخت بەبەكارهێنانی سیستەمی بایۆمەتری و سەرجەم رێكارەكانی رێگریكردن لە ساختەكاری بەڕێوەدەچێت، بۆیە داوا لە گەنجان دەكەین نوێنەری راستەقینەی خۆیان رەوانەی دامەزراوە دەستورییەكان بكەن”.
ئاماژەی بەوەشكرد، حكومەتی عێڕاق لە ماوەی كەمتر لەساڵێك بەسەر دەستبەكاربونیدا كاریكردوە بۆ لێكۆڵینەوە لە كوژران و برینداربوونی خۆپیشاندەران و لەئێستادا لێكۆڵینەوەكان گەیشتونەتە قۆناغی كۆتایی، هاوكات كاریانكردوە بۆ باشتركردنی سیستەمی ئابوری و فرەجۆركردنی سەرچاوەكانی داهات، لەو چوارچێوەیەشدا پرۆسەی چاكسازی ئابورییان رەوانەی پەرلەمان كردوە و چەندین دۆسیەی گەورەی گەندەڵییش رەوانەی دادگا كراون.
سەرۆك وەزیرانی عیراق لەبارەی گردبونەوەكانی ئەمڕۆش داوای لە هێزە ئەمییەكان و خۆپیشاندەران كرد پارێزگاری لە ئاشتیخوازیی گردبونەوەكان بكەن و موڵك و ماڵی گشتی بپارێزن.
