فرانك ریێستەر وەزیری دەوڵەتی فەرەنسا بۆ كاروباری بازرگانیی دەرەوە جەختدەكاتەوە، وتەكانی ئیمانوێل ماكرۆن سەرۆكی وڵاتەكەیان لەبارەی ئیسلامەوە، هێرشكردن نییە بۆسەر ئیسلام و موسڵمانان.
ئەو وەزیرە لەلێدوانێكی رۆژنامەوانیدا، جەختیكردوەتەوە، موسڵمانانی وڵاتەكەی بە ئازادانە وەك پەیڕەوكارانی ئایینەكانی دیكە دەژین، باسی لەوەشكرد، فەرەنسا بەرەنگاری تیرۆر و “ئیسلامیی توندڕەو” دەبێتەوە.
فرانك ریێستەر جارێكی دیكە پێداگیری دەكات لەوەی قبوڵ ناكەن مامەڵەكردن لەگەڵ موسڵمانان بەراورد بكرێت لەگەڵ ئەوەی بەرانبەر جوەكان كراوە لە دەیەی سێیەم و چوارەمی سەدەی رابردو لە ئەوروپادا.
وەزیری دەوڵەتی فەرەنسا بۆ كاروباری بازرگانیی دەرەوە بانگەشەی ئەوەشیكرد، هەوڵەكان بۆ بایكۆتكردنی كاڵا و بەرهەمی فەرەنسا لەلایەن وڵاتانی عەرەبییەوە سنوردارە و بەنیازیش نین بایكۆتی كاڵا و بەرهەمی توركیا بكەن، وتیشی “ئێمە وەك ئەوە ناكەین، كە توركیا كردی”.
