رۆژنامەی “ناشیۆناڵ ئینترێست”ی ئەمریكی هێرش دەكاتە سەر هەرێمی كوردستان و دەڵێت، ئەوەی پڕوپاگەندەی بۆ دەكات گوایە لە بەشەكانی تری عێراق دیموكراتیترە، تەنها هاشوهوشە، نە دیموكراتیە، نە سەقامگیرە وەك ئەوەی دەیەوێت پیشانی جیهانی بدات.
ناشیوناڵ ئینترێست لە راپۆرتەكەیدا هێمای بۆ ئەوەكردوە، هەرێمی كوردستان وا دەردەكەوێت، كە لە ناوچەكانی تری عێراق ئارامترە، بەڵام بیركردنەوە لەوەی گوایە دیموكراتیترە پێشتر و ئێستا تەنها هاشوهوشە.
رونیشكراوەتەوە، دوو بنەماڵە و حزبە سیاسیەكانیان لە جەنگی دوەمی كەنداوەوە لەساڵی 1991ــەوە كۆنترۆڵی ناوچەكەیان كردوە، یەكەمیان پارتی بە سەرۆكایەتی مەسعود بارزانی، كە حزبێكی خێڵەكییە، دوەمیش حزبی یەكێتی، كە پێشتر جەلال تاڵەبانی سەرۆكایەتیی دەكرد، بەڵام دوای كۆچی دوایی تاڵەبانی، خێزانەكەی كۆنترۆڵیان كردوە.
رۆژنامە ئەمریكییەكە باسی لەوەشكردوە، لە دوفاقیەكی تونددا لەگەڵ بەغدا، لە هەرێم سەركردایەتیەكی تەقلیدی نییە، كە پابەندبن بە سەروەریی یاسا یاخود ئیرادەی هەڵبژاردنەوە، بۆ نمونە لەساڵی 1992 هەڵبژاردنێكی نیمچە ئازاد هەبوو، بارزانی و تاڵەبانی 50 بە 50 دەنگەكانیان دابەشكرد و دەستكەوتەكانیش دابەشكراون.
رۆژنامەكە دەشڵێت، دوای پشتبەستن بە دەستور، بارزانی كرایە سەرۆكی هەرێم، بەڵام دوای كۆتاییهاتنی دوو ویلایەت، رازی نەبوو دەستبەرداری پۆستەكەی ببێت و چەند جارێك داوای درێژكردنەوەی كرد، بارزانی دوو بژاردەی لەبەردەمدابوو، یەكەم ئەوەبوو ببێت بە نیڵسۆن ماندێلا، یاخود یاسر عەرەفاتی كورد، ئەویش لەرێگەی كارەكانی و پابەندبون بە دیموكراتی، دوەم بژاردەش ئەوەبوو كوردستان بگۆڕێت بۆ چینێكی دەوڵەمەندی گەندەڵ، بارزانیش بژاردەی دوەمی گرتەبەر، بارزانی لە بیرەوەریدا وەك پیاوێك دەمێنێتەوە كە بە مایەپوچی هاتە كوردستان و بە ملیاردێری خانەنشین بوو.
