لە دوو رۆژدا دەیان خۆپیشاندەر و كارمەندی ئەمنی برینداربون

كۆمیسیۆنی باڵای مافەكانی مرۆڤ لە عیراق رایگەیاند، لە میانی خۆپیشاندانەكانی دوو رۆژی رابردوی بەغدای پایتەخت و پارێزگاكانی دیكەدا، 25 خۆپیشاندەر و 45 كارمەندی ئەمنی برینداربون، 91 كەسیش بەهۆی تێوەگلانیان لە توندوتیژییەكان، دەستگیركراون.
رۆژی یەكشەممەی رابردوو، لە یەكەمین ساڵیادی خۆپیشاندانەكانی 25ی تشرینی یەكەمی 2019دا، خۆپیشاندان لە زۆربەی پارێزگاكانی عیراق ئەنجامدرا و بەهۆی روبەڕوبونەوەی نێوان خۆپیشاندەران و هێزە ئەمنییەكان، توندوتیژیی لێكەوتەوە.
لە راگەیەندراوێكی كۆمیسیۆنی باڵای مافەكانی مرۆڤ لە عیراقیش ئاماژە بەوەكراوە، 13 خۆپیشاندەر و هەشت كارمەندی ئەمنی لە بەغدا برینداربون، 91 كەسیشیان بە تۆمەتی ئەنجامدانی توندوتیژی دەستگیركردوە.
هەروەها لە پارێزگای بابل 12 خۆپیشاندەر و 22 كارمەند و لە پارێزگای كەربەلاش 15 كارمەندی دیكەی ئەمنی برینداربون.
لای خۆیەوە وەزارەتی تەندروستیی عیراق لە راگەیەندراوێكدا ئاشكرایكردبو، لە میانی روبەڕوبونەوەكانی یەكەمین ساڵیادی خۆپیشاندانەكانی تشرینی یەكەمی 2019دا، 240 كەس برینداربون، كە 200یان لە هێزە ئەمنییەكانن، هەروەها 141 خۆپیشاندەریش دەستگیركراون.