ئەمریكا و روسیا لێكتێگەیشتنی نێوان ئەرمینیا و ئازەربایجان رادەگەیەنن بۆ كەمكردنەوەی گرژی و پێكدادانەكان لە هەرێمی ناگۆرنۆ قەرەباغ، مۆسكۆ هەڕەشەی ئەوە دەكات، ئەگەر شەڕ بەردەوام بێت، پشتگیریی ئەرمینیا دەكات.
لە راگەیەندراوێكی هاوبەشی نوێنەرانی روسیا و ئەمریكادا هاتووە، بە چاودێریی ئەمریكا و روسیا، لێكتێگەیشتن لەنێوان ئەرمینیا و ئازەربایجان هاتووەتە ئاراوە لەسەر كەمكردنەوەی گرژییەكان لە هەرێمی قەرەباغ، لەو نێوەندەدا وەزیرانی دەرەوەی ئەرمینیا و ئازەربایجان لە جنێڤ كۆبوونەتەوە، هەردوولا رێككەوتوون لەسەر گرتنەبەری چەند هەنگاوێك بە مەبەستی كۆتاییهێنان بە گرژییەكانی هەرێمی ناگۆرنۆ قەرەباغ و لەوبارەیەوە گەیشتون بە لێكتێگەیشتنێكی هاوبەش.
بە پێی رێككەوتنەكە، هەردوو وڵاتەكە تەرمی كوژراوان دەگۆڕنەوە و دیلەكانی نێوانیشیان لەماوەی هەفتەیەكدا ئاڵوگۆڕ دەكەن، بەڵێنیشیان داوە چیتر لە هێرشەكاندا هاووڵاتیان نەكەنە ئامانج.
لای خۆیەوە وەزارەتی دەرەوەی روسیا هۆشداریی دەدات لە ئەگەری بەردەوامبوونی شەڕ لە هەرێمی ناگۆرنۆ قەرەباغ، بە ڕوونی دەڵێت، ئەگەر شەڕ لە هەرێمەكە بەردەوام بێت، مۆسكۆ پاڵپشتیی پێویستی ئەرمیانیا دەكات.
