دوو فێڵبازی هندی پزیشكێك هەڵدەخڵەتێنن و قۆریەكی بە حسابی قۆریەكەی عەلائەدین پێدەفرۆشن و بەفێڵ خێوێكیشیان پیشانداوە گوایە لە قۆریەكەوە هاتوەتە دەرەوە.
سەرچاوەكانی هەواڵی هندستان بڵاویانكردوەتەوە، ئەو دوو فێڵبازە خۆیان بە جادوگەر ناساندوە و وتویانە كە قۆریەكەی عەلادینیان پێییە و تازە لە لەندەنەوە هاتوە، پێشیان وتوە قۆریەكە سەرجەم ئاواتەكانی دەهێنێتە دی و داوای زیاتر لە 250 هەزار دۆلاریان كردوە و دواتر لەسەر 250 هەزار رێكەوتون و پێشەكی 41 هەزار و 60 دۆلاریشیان لێوەرگرتوە.
ئەوەش ئاشكراكراوە، روداوەكە لە شاری میروت لە باكوری هندستان رویداوە و پزیشكەكە ناوی “لایك خان”ە و دوای ئەوەی زانیویەتی هەڵخڵەتێنراوە لای پۆلیس سكاڵای تۆماركردوە، فێڵبازەكان وایان لێكردوە جنۆكە ببینێت كە لە قۆریەكەوە دەردەچێت بەڵام هەرجارێك داوای كردوە قۆریەكە بباتەوە بۆ ماڵەوە رەتیانكردوەتەوە و وتویانە كە زیان دەگەیەنێت.
بەپێی راپۆرتەكانی پۆلیس، هاوسەری ژنێكی نەخۆش كە بەردەوام سەردانی خانی كردوە رۆڵی جنۆكەكەی بینیوە و وتویەتی جنۆكەیە و ناوی “ئیسلامەدین”، هێزەكانی پۆلیس دوو فێڵبازەكەیان دەستگیركردوە بەڵام تائێستاش جنۆكە ساختەكە بێسەروشوێنە.
