نرخی نەوتی خاو زیاتر لە 3% پاشەكشەی كرد و نرخی یەك بەرمیل خاوی برێنت دابەزی بۆ كەمتر لە 37 دۆلار.
بەپێی راپۆرتە ئابوریەكان لە بازاڕەكانی نەوتی خاوەوە، ئەمڕۆ دووشەممە نرخی نەوتی خاو دابەزینی بەخۆیەوە بینیوە و یەك بەرمیل خاوی برێنت دۆلارێك و 34 سەنت، واتە 3.5% دابەزیوە و بە 36 دۆلار و 60 سەنت مامەڵەی پێوەدەكرێت.
هەروەها بەرمیلێك خاوی خۆرئاوای تەكساسی ئەمریكا دۆلارێك و 41 سەنت، واتا 3.9% دابەزینی بەخۆیەوە بینیوە و یەك بەرمیل بە 34 دۆلار و 38 سەنت دەفرۆشرێت، بەرمیلێك تێكەڵەی رێكخراوی ئۆپێكیش بەرامبەر 37 دۆلار و 12 سەنتە.
شارەزایانی ئابوری باسلەوەدەكەن، یەكێك لە هۆكارە سەرەكیەكانی دابەزینی نرخی نەوت لە ماوەی رابردودا بۆ گەڕانەوەی كەرەنتین و داخستن دەگەڕێتەوە لە چەند وڵاتێك، ئەوەش بەهۆی دوبارە بەرزبونەوەی ژمارەی توشبوانی ڤایرۆسی كۆرۆنا لە زۆربەی وڵاتانی جیهان.
