دەستە لێكۆڵینەوەی دادگایی سەربە سەرۆكایەتی دادگای تێهەڵچونەوەی بەغدا فەرمانی دەستگیركردنی بۆ راوێژكارێكی مستەفا كازمی و وەكیلێكی پێشكەوتوی پێشوی وەزارەتی كارەبا دەركرد.
دەستە لێكۆڵینەوەی دادگایی لە پەڕاوێكدا كە ئاڕاستەی ئەندامانی جێبەجێكردنی فەرمانی دادوەریی و سەرجەم هێزەكانی پۆلیسی كردوە ئاماژەی بەوەداوە، رێگەیان پێدراوە تۆمەتبار “رەعد موحسین غازی” دەستگیربكەن و بیهێننە بەردەممان، بەهۆی ئەوەی لە لیژنەكە سكاڵای لەسەر تۆمار كراوە.
سەرچاوەكانی هەواڵی عێراقیش ئەوەیان ئاشكراكردوە، رەعد موحسین ئەندامی دەستەی راوێژكارانی سەرۆك وەزیرانە، هەروەها فەرمانی دەستگیركردن بۆ وەكیلی پێشكەوتوی پێشوو لە وەزارەتی كارەباش دەرچوە.
رونیشكراوەتەوە، پەڕاوەكە جێبەجێ كراوە و راوێژكارەكەی سەرۆك وەزیران دەستگیركراوە، تائێستاش هۆكاری فەرمانی دەستگیركردنەكە روون نییە و لە پەڕاوەكەشدا ئاماژەی پێنەدراوە.
