پێشكەوتنی بایدن لە هەڵبژاردنی سەرۆكایەتیی ئەمریكا، كاریگەریی لەسەر نرخی نەوت هەبوو و دابەزی.
بەرەبەیانی ئەمڕۆ پێنجشەممە لە بازاڕەكانی ئاسیا نرخی نەوت بە رەنگی سوور كرایەوە و دابەزی، نەوتی برێنت نزیكەی %1.30ی نرخەكەی لەدەستدا و هەر بەرمیلێك بە 40 دۆلار و 33 سەنت مامەڵەی پێوەكرا، هەروەها نرخی نەوتی سوكی تەكساسی ئەمریكا دابەزی و هەر بەرمیلێك بە 38 دۆلار و 63 سەنت مامەڵەی پێوەكرا.
هۆكاری ئەوەی بازاڕەكانی نەوت بە نەرێنی كاردانەوەیان هەبێت بەرانبەر بە سەركەوتنی جۆ بایدن، بۆ ئەوە دەگەڕێتەوە، كە ناوبراو داكۆكی لە پەرەپێدانی سەرچاوەكانی وزەی نوێ دەكات و لەگەڵ بەردەوامبوون لە پشتبەستن بە نەوت نییە، زیاتر پشتگیریی پاككردنەوە و گونجاندنەوەی ژینگە دەكات.
