دوا نزیكەی مانگ و نیوێك لە شەڕی نێوانیان و كەوتنەوەی سەدان كوژراو و بریندار، شەڕی نێوان ئازەربایجان و ئەرمینیای هاوسێی لە هەرێمی ناگۆرنۆ قەرەباغ كۆتایی هات.
هەریەكە لە ئەرمینیا، ئازەربایجان و روسیا، رێككەوتنی ئاشتیی كۆتاییان راگەیاند بۆ ئاگربەست لە هەرێمی ناگۆرنۆ قەرەباغی ناكۆكی لەسەر.
لەو بارەیەوە وەزارەتی بەرگریی ئەرمینیا بڵاویكردوەتەوە، شەڕ لەگەڵ ئازەربایجان كۆتایی هات و چەندین كار هەیە پێویستە بكرێن.
باسی لەوەشكردوە، هیواخوازین لە هەموان رێگری بكەن لە هەر كارێكی تێكدەرانە، پێویستە لە هەڵەكانی رابردوو فێرببین و سەیری داهاتوو بكەین و سوپایەكی بەهێز بونیاد بنێین، كە شایستەی نەوەكانی ئەرمینیا بێت.
لای خۆشیەوە نیكۆڵ باشینیان سەرۆك وەزیرانی ئەرمینیا رایگەیاند، رێككەوتنێكی ئازاربەخشیان لەگەڵ هەریەكە لە ئازەربایجان و روسیا واژۆكردوە بۆ كۆتاییهاتنی شەڕی هەرێمی ناگۆرنۆ قەرەباغ.
باشینیان وتی، هیچ بژارەیەكی دیكەی لەبەردەمدا نەبووە، تەنها واژۆكردنی رێككەوتنەكە نەبێت.
رونیشیكردەوە، بڕیارەكەی لەپاش هەڵسەنگاندنی سەركردە مەیدانییەكانی سوپای وڵاتەكەی داوە، كە پێیانوابووە بۆ ئێستا ئەوە باشترین چارەسەرە.
هەروەها ڤلادیمێر پوتن سەرۆكی روسیا رێككەوتنەكەی دووپاتكردەوە، ئاشكرایكرد هەموو پێكدادانێكی سەربازیی نێوان هەردوو وڵات رادەگیرێت، هێزەكان لە شوێنی ئێستای خۆیان دەمێننەوە و هێزە ئاشتیپارێزەكانی روسیا دەكەونە نێوانیانەوە.
