ئەمریكا دوو لیوای هێزەكانی پێشمەرگە پڕچەك دەكات و شۆڕش ئیسماعیل وەزیری پێشمەرگەش دەڵێت، بۆ روبەڕوبونەوەی تیرۆر لە قۆناغێكی هەستیاردان.
كاروانێكی هاوكارییە لۆجستیەكانی ئەمریكا گەیشتە دەستی هێزەكانی پێشمەرگە و هەردوو لیوای 14 و 16ی سەر بە وەزارەتی پێشمەرگە پڕچەككران.
لەرێوڕەسمەكەدا شۆڕش ئیسماعیل وەزیری پێشمەرگە وتارێكی پێشكەشكرد، وتی، “شانازییە بۆ ئێمە، كە لەگەڵ هاوپەیمانەكانماندا رۆژبەرۆژ برەو بە پەیوەندییەكانمان دەدەین، هاوكاریەكانی ئەمریكا بۆ هێزی پێشمەرگە سودێكی زۆری هەیە، بەئاڕاستەی پڕچەككردنی پێشمەرگە، كە دەبێتە دەرفەتێكی گرنگ بۆ بەهێزكردنی هێزەكانمان لەرووی لۆجسیكەوە”.
شۆڕش ئیسماعیل باسی لەوەشكرد، “بۆ روبەڕوبونەوەی تیرۆر، پێشمەرگە لە قۆناغێكی هەستیاردایە و هەست بە دروستبونەوەی داعش و بەهێزبونیان دەكەین، بۆیە لەگەڵ هاوپەیمانەكانمان هەنگاوی جدییمان بۆ بەرەنگاربونەوەیان ناوە و لەئامادەباشیداین، وەزارەتمان بۆ باشتركردنی بارودۆخی پێشمەرگە هەنگاوی باشی ناوە، بەڵام خراپیی بارودۆخی دارایی و بڵاوبونەوەی كۆرۆنا، رێگربون لەجێبەجێكردنی پلانەكانمان”.
