ئەندامێكی دەستەی بەڕێوەبەریی كەجەكە دەڵێت، ئەوە پەكەكە نییە، كە دان بە حكومەتی هەرێمدا نانێت، بەڵكو پارتی دیموكراتی كوردستانە، بەو پێیەی بێ ئاگاداریی وەزارەتی پێشمەرگە، هێز دەجوڵێنێت.
مستەفا قەرەسو ئەندامی دەستەی بەڕێوەبەریی كۆما جڤاكێن كوردستان “كەجەكە”، لە بەرنامەیەكی تەلەفزیۆنیی كەناڵی “میدیا هەبەر” قسەی كردووە، پارتیی بە بوونی ویستی هەڵگیرسانی شەڕ تۆمەتبار كرد، دەڵێت، پێویستە پارتی دەست لە هەڵوێستی كۆكردنەوەی هێز هەڵبگرێت، چونكە توركیا بە چوار چاو چاوەڕێی هەڵگیرسانی شەڕی نێوان پارتی و پەكەكەیە.
قەرەسو رەتیشیدەكاتەوە، كە پەكەكە دان بە حكومەتی هەرێمدا نەنێت، رایگەیاندوە، پارتی بێ ئاگاداریی وەزارەتی پێشمەرگە هێز جێگیردەكات و فشاریش دەخاتە سەر یەكێتی و گۆڕان بۆ ئەوەی هاوكاریی بكەن، بۆیە بەرپرسەكەی پەكەكە دەڵێت، “ئەوەی گوێ لە حكومەتی هەرێم ناگرێت پارتییە”، نەك پەكەكە.
