مایك پۆمپیۆ وه‌زیری ده‌ره‌وه‌ی ئه‌مریكا قسه‌ی له‌سه‌ر ئه‌نجامی هه‌لبژاردنه‌كانی ئه‌مریكا كرد، دڵنیایه له‌وه‌ی ترامپ هه‌ڵبژاردنه‌كه‌ی بردووه‌ته‌وه، ده‌ڵێت، گواستنه‌وه‌یه‌كی ئاسانی ده‌سه‌ڵات له به‌رژه‌وه‌ندیی ئیداره‌ی دووه‌می دۆناڵد ترامپ رووده‌دات.
تیمه‌كه‌ی دۆناڵد ترامپ و به‌شێك له به‌رپرسانی كۆمارییه‌كان سوورن له‌سه‌ر ئه‌وه‌ی له هه‌ڵبژاردنی سه‌رۆكایه‌تیدا ساخته كراوه، له‌و باره‌یه‌وه مایك پۆمپیۆ وه‌زیری ده‌ره‌وه‌ی ئه‌مریكا له كۆنفرانسێكی رۆژنامه‌وانیدا رایگه‌یاند، پێویسته دڵنیابین له‌وه‌ی هیچ ده‌نگێكی نایاسایی هه‌ژمار نه‌كراوه، داواشی له ته‌واوی كۆمارییه‌كان و مایك پێنس جێگری سه‌رۆكی ئه‌مریكا كرد، كه پشتگیریی هه‌ڵمه‌ته‌كه‌ی ترامپ بكه‌ن بۆ رێگریكردن له تێپه‌ڕاندنی ساخته‌كاری.
وه‌زیری ده‌ره‌وه‌ی ئه‌مریكا دڵنیایه له‌وه‌ی دۆناڵد تره‌مپ سه‌ركه‌وتووی هه‌ڵبژاردنی سه‌رۆكایه‌تیی ئه‌مریكایه و ده‌ڵێت، گواستنه‌وه‌یه‌كی ئاسانی ده‌سه‌ڵات ده‌بینن له به‌رژه‌وه‌ندیی ویلایه‌تی دووه‌می دۆناڵد ترامپ.
لای خۆیه‌وه مایك پێنس جێگری سه‌رۆكی ئه‌مریكا به هه‌مان شێوه به‌رگری له سه‌رۆكه‌كه‌ی ده‌كات و ده‌ڵێت، شه‌ڕ له‌سه‌ر هه‌ر ده‌نگێكی یاسایی ده‌كه‌ن بۆ سه‌رۆك ترامپ.
هه‌روه‌ها دۆنالد تره‌مپ له‌ڕیگه‌ی ماڵپه‌ڕی “Save America” ده‌ستیكردووه به كۆكردنه‌وه‌ی هاوكاریی دارایی بۆ كه‌مپه‌ینه‌كه‌ی بۆ ئاشكراكردنی ئه‌و پێشێلكارییانه‌ی، كه به‌وته‌ی ترامپ له هه‌ڵبژاردنی سه‌رۆكایه‌تیدا روویانداوه.
