حكومەتی نەمسا كۆمەڵێك رێوشوێنی بۆ بەرەنگاربوونەوەی تیرۆر خستووەتە بەردەم پەرلەمانی وڵاتەكەی، پێشنیاز كراوە، ئەوانەی بە ماددەی تیرۆر دەستگیركراون بتوانرێت بۆ هەمیشە لە زیندان بمێننەوە، بە كامێراش چاودێریی ئەوانە بكرێت، كە بە تاوانی تیرۆر سزادراون و دوای تەواوكردنی حوكمەكەكەیان ئازادكراون.
سێباستیان كۆرتز راوێژكاری نەمسا لە كۆنفرانسێكی رۆژنامەوانیدا رایگەیاند، حكومەتەكەیان لەسەر كۆمەڵێك رێوشێن رێككەوتووە، بۆ بەرەنگاربونەوەی تیرۆر و توندوتیژی.
بڕگەیەكی دیكەی پێشنیازەكانی حكومەتی نەمسا، بەتاوانناساندنی هەر كردەوەیەكە، كە پاڵنەرێكی ئیسلامی لە پشت بێت، بۆیە راوێژكاری نەمسا رایگەیاند، بڕگەیەك بۆ یاسای تاوان زیاد دەكەن بەناوی “ئیسلامی سیاسی”، دەڵێت، ئەمە بۆ ئەوانەیە كە تیرۆرست نین، بەڵام زەمینەسازیی بۆ دەكەن.
رۆژی 2ی ئەم مانگە لە ڤیەننای پایتەختی نەمسا چەكدارێك دەستڕێژی گوللەی لە خەڵك كرد، لە ئەنجامدا چوار كەسی سڤیل كوژران و 23 كەسی دیكەش بریندار بوون، نەمسا هێرشەكەی بە “تیرۆرستی” ناوبرد و وتی، ئەنجامدەرەكەی پەیوەندیی بە داعشەوە هەبووە.
