پەرلەمانتارێكی كورد لە لیژنەی دارایی پەرلەمانی عیراق رایدەگەیەنێت: دەبێت حكومەتی هەرێم بەخێرایی بگاتە رێككەوتن لەگەڵ حكومەتی ناوەند تا سودمەند بێت لە یاسای قەرزكردنەكەی بەغدا، بەپێچەوانەوە هەرێم كێشەی گەورەتری بۆ دروست دەبێت و بەمنزیكانەش پرۆژە یاسای بودجەی 2021 دێتە پەرلەمان.
شیروان میرزا، پەرلەمانتاری فراكسیۆنی یەكێتی لە لیژنەی دارایی ئەنجومەنی نوێنەرانی عیراق لەبارەی پەسەندكردنی یاسای قەرز لەپەرلەمانی عیراق بەبێ ئامادەبوونی په‌رله‌مانتارانی كورد، له لێدوانێكدا بۆ ماڵپه‌ڕی فه‌رمی حزبه‌كه‌ی راگەیاندوه: هەوڵی زۆرو گفتوگۆی زۆرمانكرد لەگەڵ كوتلە شیعییەكان لەسەر 320 ملیارەكە، بەڵام بەهۆی رێكنەكەوتنی دوو ساڵی رابردوو، بێ ناردنی نەوت ئامادە نەبوون سازش بكەن.
ناوبراو ئاماژه‌ی به‌وه‌شكردووه، خالد شوانی وەك نوێنەری حكومەتی هەرێم بەشداری كۆبوونەوەی دوێنێی كرد، رایگەیاند حكومەتی هەرێم ئامادەیە ناوەرۆكی ئەو نامەیە جێبەجێ بكات، كە لە مانگی 10ی 2020 بۆ بەغدای ناردووە، ئەگەر نەوت بنێردرێت بۆ بەغدا، هەرێم پارەی زیاتر لە 320 ملیارەكەی پێدەدرێت لەلایەن بەغداوە.
به‌وته‌ی شیروان میرزا، “دەبێت حكومەتی هەرێم بەخێرایی بگاتە رێككەوتن لەگەڵ حكومەتی ناوەند، تا سودمەند بێت لە یاسای قەرزكردنەكەی بەغدا، بەپێچەوانەوە هەرێم ئامادەیی خۆی نیشان نەدات و نیازپاكی خۆی بۆ رێككەوتن نیشان نەدات، كێشەی زۆر گەورەتری بۆ دروست دەبێت، چونكە بەم نزیكانە پرۆژە یاسای بودجەی 2021 دێتە پەرلەمان.
ئەو ئەندامەی لیژنەی دارایی پەرلەمانی عیراق ئه‌وه‌شی خستۆته‌ڕوو، حكومەتی هەرێم بواری ئەوەی پێدراوە تا لەگەڵ سۆمۆ گفتوگۆ بكات بۆ ناردنی ئەو بڕە نەوتەی، كە لە توانایدا هەیە رۆژانە بینێرێت، ئێستا تۆپەكە لە گۆڕەپانی حكومەتی هەرێمە، كاتی ئەوەیە نەوت لە نەهامەتییەوە ببێتە سەرچاوەی خۆشگوزەرانی بۆ خەڵكی هەرێمی كوردستان.
