یوسرا رەجەب: كورد باجی عینادیكردنی هەندێك پەرلەمانتاری پارتی دەدات لە پەرلەمانی عیراق

یوسڕا رەجەب، ئەندامی ئەنجومەنی نوێنەرانی عێراق رایدەگەیەنێت، گەلی كورد باجی هەڵسوكەوت وعینادیكردنی هەندێ ئەندام پەرلەمانی فراكسیۆنی پارتی دەدا لە پەرلەمانی عێراق.
یوسرا رەجەب، لەبارەی تێپەڕاندنی یاسای قەرز بەبێ بەشداری نوێنەرانی كورد رایگەیاند،”ئەوەی رویدا دەرئەنجامی عینادیكردنی بەرپرسانی هەرێمی كوردستان و چەند ئەندام پەرلەمانێكی فراكسیۆنی پارتی دیموكرات بو لە پەرلەمانی عێراق، نەك هەماهەنگی نەكردنی لایەنە عێراقیەكان لە گەڵ كورد”.
ئەو پەرلەمانتارە باسی كۆبونەوەیەكیان دەكات لەگەڵ سەرۆكی لیژنەی دارایی پەرلەمانی عێراق و دەڵێت،”سەرۆكی لیژنەی دارایی وتی: برادەرانی پارتی دو ئەندام پەرلەمانیان هەیە لە لیژنەكەمان كەس ناتوانێ پێشنیارێك بكا هێشتا ناهێڵن پێشنیارەكە بەتەواوەتی بخوێنێتەوە ئەوان دەڵێن (نا نا نا قبوڵمان نییە) ئەمەش وای لێكردوین زیاتر پەست ببین و نەتوانین لەوە زیاتر چاوەڕوانی رازیكردنی دڵی كورد بین، چونكە خەڵك زیاتر لە 45 رۆژە موچەی وەرنەگرتوە، واتا گەلی كورد باجی هەڵسوكەوت وعینادیكردنی هەندێ ئەندام پەرلەمانی فراكسیۆنی پارتی دەدا لە پەرلەمانی عێراق.”