كۆمسیۆنی باڵای سەربەخۆی هەڵبژاردنەكانی عیراق رەتیدەكاتەوە 4 ملیۆن كارتی دەنگدان دیار نەمابێت و جومانە غلای ئەندامی كۆمسیۆنەكەش دەڵێت “ئەوە لە هەڵبژاردنی پێشودا رویداوە”.
جومانە لەلێدوانێكدا بە رۆژنامەی “سەباح”ی نیمچەفەرمی وتوە “دیارنەمانی 4 ملیۆن كارتی دەنگدان راست نییەو ئەو بابەتە لە هەڵبژاردنی پێشودا بوو لە ساڵی 2018”.
باسی لەوەشكردوە، لەبەر پاراستنی دەنگی دەنگدەران بازنەی هەڵبژاردن لێكۆڵینەوەیەكی تایبەتی بەو كارتانەی دەنگدان ئامادەكردوە، كە وەرنەگیراونەتەوە، هەروەها لیژنەی لێكۆڵینەوە بۆ زانینی راستی روداوەكان و دیاریكردنی كارمەندانی كەمتەرخەم و سزادانیان لە رێگەی یاساوە، پێكهێنراوە.
هەروەها ئەندامەكەی كۆمسیۆنی باڵای هەڵبژاردنەكانی عیراق جەختدەكاتەوە، سەرجەم ئەو كارتانەی دیارنەماون، پوچەڵكراونەتەوە و چیتر ناتوانرێت بەكاربهێنرێن، جگە لە خاوەنی راستەقینەی كارتەكانیش، كەسی دیكە ناتوانێت بەو كارتانە دەنگ بدات.
