كۆبونەوەی سێ سەرۆكایەتییەكەی هەرێم دەستیپێكرد و راوێژكاری دەبێت

كۆبونەوەی سێ سەرۆكایەتییەكەی هەرێمی كوردستان دەستیپێكرد و پرسی پەسەندكردنی یاسای قەرز تاوتوێدەكەن، رێواز فایەق سەرۆكی پەرلەمانی كوردستان دەڵێت، كۆبونەوەكە راوێژكارییە.
كەمێك لەمەوپێش كۆبونەوەی نێچیرڤان بارزانی سەرۆكی هەرێمی كوردستان، قوباد تاڵەبانی جێگری سەرۆكی حكومەتی هەرێم و رێواز فایەق سەرۆكی پەرلەمانی كوردستان دەستیپێكرد، كە بڕیارە پرسی پەسەندكردنی یاسای قەرز لەلایەن پەرلەمانی عیراقەوە تاوتوێبكەن.
پێش كۆبونەوەی سێ سەرۆكایەتییەكە، هەریەكە لە قوباد تاڵەبانی و رێواز فایەق كۆبونەوەیەكی دووقۆڵییان ئەنجامدا، دواتر سەرۆكی پەرلەمانی كوردستان قسەی بۆ رۆژنامەنوسان كرد، رایگەیاند، كۆبونەوەی سێ سەرۆكایەتییەكە راوێژكاری دەبێت، “دیراسەی دۆخی خۆمان دەكەین، كە ئێمە دەتوانین چی بكەین بۆ روبەڕوبونەوەی ئەم پێشهاتە”.
راشیگەیاند، سێ سەرۆكایەتیەكە پێشوازییەكی باشیان كردوە لە داواكارییەكەی مەكتەبی سیاسیی یەكێتی و لایەنە سیاسیەكان، بۆ دواخستنی كۆبونەوەی سێ سەرۆكایەتیەكە لەگەڵ نوێنەرانی كورد لە بەغدا، بۆیە كۆبونەوەكە دواخراوە بۆ كاتێكی تر تا زەمینەیەكی بۆ دەڕەخسێت، بەو پێیەی ئامانجی سێ سەرۆكایەتییەكە لە كۆبونەوەكە ئەوەیە، هەمان یەكدەنگی بەرجەستە بكەن، كە نوێنەرانی كورد لە ئەنجومەنی نوێنەران هەیانبوو، بۆیە زەمینەسازی دەكەن بۆ كۆبونەوەی داهاتو و هەموو هێزە سیاسیەكان تیایدا بەشداربن.