دادگای عیراقی نوێكردنەوەی گرێبەستی كۆمپانیاكانی پەیوەندیكردنی مۆبایل رەتدەكاتەوە.
پێشتر محەمەد شیاع سودانی ئەندامی پەرلەمانی عیراق داوایەكی یاسایی بەرزكردبوەوە بۆ راگرتنی نوێكردنەوەی گرێبەستی كۆمپانیاكانی پەیوەندیكردنی مۆبایل، هەربۆیە چەند هەفتەیەكە دادگا سەرقاڵی لێكۆڵینەوەیە لە دۆسیەكە.
ئەمڕۆ (یەكشەممە) ئەو پەرلەمانتارە لە تویتێكدا نوسیویەتی “ئەمڕۆ دادگای عیراقی قسەی خۆی كرد، گەلی سەرخست و سەربەخۆیی و پیشەییبونی خۆی دوپاتكردەوە، كاتێك بڕیاری دا نوێكردنەوەی گرێبەستەكان رەتبكاتەوە”.
هەرچەندە تائێستا دادگای عیراقی هیچ راگەیەندراوێكی فەرمیی لەوبارەیەوە بڵاونەكردوەتەوە، بەڵام بڕیارەكەی دادگا هەرسێ كۆمپانیای ئاسیاسێڵ، كۆڕەك تیلیكۆم و زەین دەگرێتەوە.
ئەو كۆمپانیایانە بە نەدانی باج بە حكومەتی فیدراڵی تۆمەتبار دەكرێن.
