ئاژانسی هەواڵی فەرمیی سوریا ئاشكرایكرد، 50 تانك و زرێپۆشی ئەمریكی ئەو وڵاتەیان بەجێهێشتووە و بە ئاراستەی سنوری عێراق رۆیشتون.
بەگوێرەی هەواڵێكی ئاژانسی سانا، 50 تانك و زرێپۆشی هێزەكانی ئەمریكا، لە رێگەی دەروازەی وەلید-ەوە بە ئاراستەی عێراق رۆیشتون، لەكاتی ئەو جووڵە سەربازییەشدا رێوشوێنێكی ئەمنیی توند گیراوەتەبەر.
ئەم جووڵەپێكردنەی هێزەكانی ئەمریكا، دوای رۆژێك دێت لە یاداشتێكی كریستۆفەر میلەر وەزیری بەرگریی ئەمریكا بەوەكالەت، كە رایگەیاندبوو، كاتی ئەوە هاتووە هێزەكانی ئەمریكا بگەڕێنرێنەوە بۆ وڵات و كۆتایی بە هەموو شەڕەكان بهێنرێت.
میلەر، كە چەند رۆژێكە لەلایەن ترامپەوە بەوەكالەت كراوەتە وەزیری بەرگریی ئەمریكا، لە یاداشتنامەیەكدا بۆ بەرپرس و كارمەندانی وەزارەتی بەرگری “پێنتاگۆن”، نیازی ئیدارەكەی ترامپی بۆ كشانەوەی هێزەكانی ئەمریكای لە ئەفغانستان و خۆرهەڵاتی ناوەڕاست خستەڕوو.
