جاسم ئەلموسەوی شیكەرەوەی سیاسیی عیراق سێ بنەما بۆ چارەسەركردنی كێشە و قەیرانەكانی نێوان حكومەتی فیدراڵی و هەرێم دیاری دەكات.
ئەو سێ بنەمایەی ئەلموسەوی دیاریكردون بریتین لە: بیركردنەوەی هەردوو حكومەت لە بردنەوە و دۆڕاندنێكی قبوڵكراو، پەیامی دڵنیایی بدرێت، كە جارێكی دیكە ناگەڕێنەوە بۆ ریفراندۆم و دوركەوتنەوە لە گوتاری خۆپەرستی، هەروەها رێككەوتنێكی سیاسیش لەنێوانیاندا بكرێت، كە چوارچێوەیەكی یاسایی هەبێت.
شیكەرەوە سیاسییەكە بە ماڵپەڕی (فورات نیوز)ی وتوە “حكومەتی هەرێمی كوردستان ئەو مافەی نییە رێگە بگرێت لە وەزارەتە سیادییە فیدراڵییەكانی وەك بەرگری و دارایی و ناوخۆ و ئەوانی دیكە، كە دەستوەردان لە هەندێك بابەتی سەرچاوەدا نەكەن، ئەوەش ئەو خاڵانەن، كە حكومەتی ناوەندی نیگەران كردوە”.
بەگوێرەی لێكدانەوەی جاسم ئەلموسەوی شیكەرەوەی سیاسی، هەرێمی كوردستان وەك دەوڵەتێكی سەربەخۆ كاردەكات، لەكاتێكدا خودی نێچیرڤان بارزانی سەرۆكی هەرێم بە دەقی داڕشتنی فیدراڵی، فەرمانبەرە لە دەوڵەتی عیراقدا، بەڵكو هەموو سەركردە جێبەجێكارەكانی كورد لە حكومەتی هەرێمدا فەرمانبەرن لە دەوڵەتی عیراقدا و دەوڵەتیش مافی ئەوەی هەیە رۆڵی سیادی خۆی ببینێت.
هەروەها جەختدەكاتەوە، كە نەبونی چوارچێوەیەكی یاسایی بۆ پەیوەندییەكانی بەغدا و هەولێر، بۆتەهۆی زیاتربونی قەیرانەكانی نێوان هەردوولا، بۆیە دەبێت یاسا لە هەموو رێككەوتنەكانی نێوانیاندا هەبێت.
ئەم لێكدانەوەیە لەكاتێكدایە، درەنگانی شەوی رابردو، ئەحمەد مولا تەڵاڵ وتەبێژی سەرۆك وەزیرانی عێراق رایگەیاند، رێككەوتنی نێوان حكومەتی فیدراڵی و هەرێم بریتی بوە لە رەوانەكردنی 320 ملیار دینار بۆ موچەی فەرمانبەرانی هەرێم و لەئەگەری رادەستنەكردنی 250 هەزار بەرمیل نەوتیشدا، بەغدا قەبارەی زیانەكان لە پشكی هەرێمی كوردستان دەبڕێت.
وتەبێژەكە بەكەناڵی فەرمی (عێراقییە)ی وتوە، حكومەتی فیدراڵی خواستی ئەوەی هەیە پڕۆژەیاسای بودجەی ساڵی 2021 بە خێرایی پەسەندبكرێت بۆ ئەوەی كێشەی دواكەوتنی موچەی فەرمانبەران دوبارە سەرهەڵنەداتەوە، هەروەها بۆ ئەوەی بتوانن لەگەڵ زیادبونی داهاتی ناوخۆ و باشتربونی بەهای نەوت گەرەنتی موچەی فەرمانبەران بكەن.
لەبارەی موچەی فەرمانبەرانی هەرێمیش، ئەحمەد مولا تەڵاڵ جەختیكردەوە، بەگوێرەی رێككەوتنی نێوان هەولێر و بەغدا، مانگانە 320 ملیار دینار رەوانەی هەرێمی كوردستان كراوە و حكومەتی ئێستای عێراق لە بەرامبەر رەوانە نەكردنی 250 هەزار بەرمیل نەوت، لە پشكی هەرێمی كوردستان لە داهاتی فیدڕاڵی دەبڕێت، بەڵام “قبوڵ ناكەین بەهۆی ناكۆكی سیاسییەوە زیان بە فەرمانبەرانی هەرێم بگات”.
