بەشیر حەداد دەڵێت، ئەگەر قسە لەسەر قەرز بێت، بەغدا 20 ملیار دۆلاری هەرێمی كوردستان قەرزدارە، بەو پێیەی بڕینی بودجە لە بەغداوە، هەرێمی كوردستانی ناچار بە قەرز كردووە.
بەشیر حەداد جێگری دووەمی سەرۆكی پەرلەمانی عیراق لە گفتوگۆیەكیدا لەگەڵ بەشی كوردیی دەنگی ئەمریكا دەڵێت، پێویستە عێراق قەرزەكانی هەرێمی كوردستان بداتەوە، چونكە هەرێمی كوردستان بەهۆی نەناردنی بودجە و شایستە داراییەكان لە بەغداوە دوچاری قەرزبۆتەوە، بۆیە رایگەیاندوە، “ئەگەر بە حسابی قەرز بێت، بەغدا نزیكەی 20 ملیار دۆلار قەرزاری هەرێمە”.
جێگری دووەمی سەرۆكی پەرلەمانی عیراق دەشڵێت “هەم هەرێمی كوردستان قەرزداری بەغدایە، هەم بەغداش قەرزداری هەرێمی كوردستانە، پێویستە هەرلایەك قەرزدارتر بوو، بیداتەوە بەلایەنەكەی دیكە”، بەڵام بەشیر حەداد دوپاتیدەكاتەوە، بەغدا لەئێستادا ئامادە نییە بچێتە ژێر باری حساباتەكانی ڕابردوو.
لەبارەی یاسای قەرزیشەوە، ئاشكرایكردوە، كاتێك حكومەتی عیراقی ئەو یاسایەی نارد، ئەو ماددەیەی پەیوەندیی بە هەرێمی كوردستانەوە هەبوو، بەپێی رێككەوتنی 320 ملیار دینارەكەی نێوان حكومەتی هەرێم و حكومەتی فیدراڵ ناردبووی، “بەڵام زۆر بەداخەوە لایەنە سیاسیەكانی ناو پەرلەمانی عێراق گوێیان نەدا بەو رێككەوتنەی نێوان هەردوو حكومەت و گوێیان نەدا بەو شێوەیەی، كە لە حكومەتەوە هاتووە و ئەو ماددەیەیان لابرد و ماددەیەكی دیكەیان لەشوێنی دانا”.
بەشیر حەداد ئاشكراشیكرد “لەوانەیە بەم نزیكانە شاندێكی حكومەتی هەرێمی كوردستان، یان شاندێكی هونەری بۆ بودجە و نەوت، بچنە بەغدا، بۆ ئەوەی بەپەلە ئەم بارودۆخە چاك بكەنەوە”.
