رێكخراوی مافی مرۆڤی هەنگاو بڵاویكردەوە، كچێكی كوردی تەمەن 17 ساڵی خەڵكی شاری ئورمیەی رۆژهەڵاتی كوردستان، لەلایەن دادگای ئێرانەوە حوكمی 5 ساڵ زیندانی بەسەردا سەپێنرا.
رێكخراوەكە لە راپۆرتێكدا بڵاویكردەوە، (ئایناز زارع)، بەندكراوی سیاسیی تەمەن 17 ساڵ، كە لە بەندیخانەی ئورمیە بەندكراوە، لەلایەن لقی یەكی دادگای تاوانەكانی ئورمیەوە كە تایبەتە بە منداڵان و مێردمنداڵان، حوكمی پێنج ساڵ زیندانیكردنی بەسەردا سەپاندوە.
بە تۆمەتی جووڵانەوە لە دژی ئاسایشی نەتەوەیی لە ڕێگای ئەندامێتی لە پارتی ئازادیی كوردستان (پاك) ئەو حوكمە بەسەر كچە كوردە لاوەكەدا سەپێنراوە و پێیڕاگەیاندراوە.
ئاماژە بەوەشكراوە، ئەو بەندكراوە سیاسییە كە تەمەنی لە ژێر 18 ساڵەوەیە، لە كاتی بەڕێوەچوونی دادگاكەی، لە مافی هەبوونی پارێزەری هەڵبژێردراوی خۆی بێبەش بووە.
ئایناز زارع لەگەڵ دایكی بە ناوی شاناز سادقی فەڕ تەمەن 32 ساڵ لە ساڵی ڕابردووەوە لەلایەن هێزەكانی ئیدارەی ئیتڵاعاتی بانەوە دەستبەسەركراوە و لەوكاتەوە لە بەندیخانەی ئورمیە ڕاگیراوە.
شانازی سادقی‌فەڕ ماوەی سێ ساڵ ئەندامی پارتی ئازادی كوردستان بووە و دژ بە ڕێكخراوی داعش شەڕی كردووە، دوای جیابوونەوەی لەو حزبە و وەرگرتنی پارێزبەندی، لەكاتی گەڕانەوە لەگەڵ ئاینازی كچی لەلایەن ئیدارەی ئیتڵاعاتی بانەوە دەستبەسەركرابوون و ماوەیەك لەمەوبەر حوكمی 15 ساڵ زیندانیكردنی بۆ دەركراوە.
