سەردانێكی وەزیری دەرەوەی ئەمریكا بۆ ئیستانبوڵ، ناكۆكیی لەنێوان واشنتۆن و ئەنقەرەی لێكەوتوەتەوە، لەلێدوانێكیشیدا بۆ رۆژنامەیەكی فەڕەنسی، پۆمپیۆ سیاسەتەكانی توركیا بە زۆر دوژمنكارانە وەسفدەكات.
شەوی رابردوو مایك پۆمپیۆ وەزیری دەرەوەی ئەمریكا گەیشتە شاری ئیستانبوڵی توركیا، سەردانەكەی دیپلۆماسی نییە و هەماهەنگیی لەگەڵ ئەنقەرەدا نەكردوە، بۆیە مەولود چاوشئۆغلو وەزیری دەرەوەی توركیا پێشوازیی لێنەكرد، بەوپێیەی توركیا دەیویست سەردانەكە فەرمی بێت و پۆمپیۆ سەردانی ئەنقەرە بكات و دواتر بچێتە ئیستانبوڵ، بەڵام راستەوخۆ سەردانی ئەو شارە گەورەیەی توركیای كرد.
بڕیارە پۆمپیۆ لە سەردانەكەیدا بچێتە كڵێسای ئەرسەدۆكسی رۆمی و چاوی بە قەشەی كڵێساكە بكەوێت، هەروەها سەردانی مزگەوتی رۆستەم پاشاش لە ئیستانبوڵ دەكات.
پێش ئەو سەردانە، وەزیری دەرەوەی ئەمریكا لە فەڕەنسا بوو، لەگفتوگۆیەكیدا لەگەڵ رۆژنامەی لۆفیگارۆ، هەڵوێستەكانی توركیای لەم چەند ساڵەی دواییدا بە “زۆر دوژمنكارانە” وەسفكرد و وتی “لەو خاڵەدا لەگەڵ ئیمانوێل ماكرۆن سەرۆكی فەرەنسا هاوڕام”.
پۆمپیۆ بەئاشكرا بە رۆژنامەكەی وتوە، توركیا چەكداری سوریی بردوەتە ئازەربایجان، لە سوریا و لیبیاش دەستوەردان دەكات، بۆیە پێویستە ئەوروپا و ئەمریكا لە بەرانبەر توركیا هاوهەڵوێست بن و كاربكرێت بۆ بەرەنگاربونەوەی ئەو هەڵوێست و سیاسەتانەی ئەنقەرە.
