چالاكوانێكی سیاسیی كورد لە سوید تیرۆر دەكرێت و تائێستاش لەلایەن پۆلیسی ئەو وڵاتەوە هیچ رونكردنەوەیەك نەدراوە.
لەوبارەیەوە فەرەیدون كونجرینی رۆژنامەنوسی كورد لە ئەكاونتی خۆیەوە لە فەیسبوك رایگەیاند، بڵێسە عومەر تێكۆشەر و چالاكی سیاسی لە سوید تیرۆركراوە.
هەروەها تیرۆركردنی چالاكوانەكەی خستوەتە ئەستۆی میتی توركیا و هۆكارەكەشی بۆئەوە گەڕاندۆتەوە، كە بڵێسە عومەر سابیر تێكۆشەر بوە و بەڕۆح لەگەڵ كارەكانیدا بوە، هەروەها دڵسۆزانە لە عفرین و باكوری كوردستان تێكۆشاوە و سڵی نەكردۆتەوە.
رۆژنامەنوسەكە نوسیویشیەتی “بڵێسە عومەر ئەوكاتانەی لە سوید بوە، دڵنیابوە لەوەی پارێزراو دەبێت، بەڵام دوژمنانی گەل ئامانجی خۆیان پێكا و تیرۆریانكرد. تائێستاش پۆلیسی ئەو وڵاتە هیچ رونكردنەوەیەكی نەداوە”.
بەگوێرەی ماڵپەڕی وێستگەنیوزیش، سەرچاوەیەكی ئاگادار و نزیكی بنەماڵەی بڵێسە عومەر وتویەتی “دوو رۆژ بو دیار نەمابو، بەڵام شەوی رابردوو پۆلیس بە خێزانەكەی وتوە لە ستۆكهۆڵمی پایتەخت كوژراوە، بە بڕوای ئێمە روداوەكە تیرۆری سیاسی دەوڵەتێكی داگیركەری كوردستانە”.
