ئەنتۆنی شیفەر عەقیدی خانەنشینی ئەمریكی و شارەزای ستراتیژی لە كۆلێژی لەندەن بۆ لێكۆڵینەوەكان دەڵێت “كەمكردنەوەی هێزەكانی ئەمریكا واتای جێهێشتنی عیراق نییە و هەركات بمانەوێت دەگەڕێینەوە”.
ئەو پسپۆڕە سەربازییەی ئەمریكا لەلێدوانێكی رۆژنامەوانیدا باسی لەوەكردوە، وڵاتەكەی بە تەواوەتی لە عیراق ناكشێتەوە و لە رووی سەربازییەوە دەمێنێتەوە، كشانەوەی هێزیش واتای دەستبەردابونی ئەو وڵاتە نییە و هەركات بیەوێت دەگەڕێتەوە.
سەبارەت بە مەترسی بەهێزبونەوەی داعش-یش، عەقید ئەنتۆنی شیفەر رونیكردوەتەوە، ئەمریكا هێزی تایبەتی هەیە، كە توانای ئەوەی هەیە رێگری لە بەهێزبونەوەی داعش بكەن، دوای راگەیاندنی روخانی خەلافەتیش هەوڵەكانی ئەو هێزەی ئەمریكا بۆ رێگریكردن لە سەرهەڵدانەوەی سەركەوتو بون، ئەگەر كێشەیەك رویدا ئەوا لێكۆڵینەوە لەوە دەكەین چ هێزێكمان پێویستە بۆ ئەو كارە.
پێشتر كریستۆڤەر میللەر وەزیری بەرگریی ئەمریكا بە وەكالەت ئاشكرایكردبو، وڵاتەكەی هێزەكانی لە عیراق لە 3 هەزار و 200 سەربازەوە بۆ 2 هەزار و 500 سەرباز كەمدەكاتەوە.
