پاش بڵاوبونەوەی هەواڵی گیانلەدەستدانی فرسەت سۆفی پارێزگاری هەولێر بەهۆی ڤایرۆسی كۆرۆناوە، نێچیرڤان بارزانی سەرۆكی هەرێمی كوردستان پرسەنامەیەك ئاراستەی خانەوادەی ناوبراو دەكات و دەڵێت “زۆر پڕۆژەی هەبوو بۆ پێشخستنی زیاتری پارێزگای هەولێر، بەداخەوە مەرگ ڕێگەی نەدا زیاتر خزمەت بكات”.
لە پرسەنامەكەیدا نێچیرڤان بارزانی جگە لە دەربڕینی غەمگینی و ماتەمینیی و سەرەخۆشی، دەڵێت، “فرسەت سۆفی وەك پەرلەمانتارێكی چالاك و یاساناسێكی لێهاتوو رۆڵێكی زۆر بەرچاوی لە پەرلەمانی كوردستاندا هەبوو، كارزانی، دەستپاكی، نیشتمانپەروەری و دڵسۆزیی د. فرسەت، ئەوی كردبوە كەسێكی خۆشەویست و جەماوەری”.
سەرۆكی هەرێم راشیگەیاندوە “دوای وەرگرتنی پۆستی پارێزگاری هەولێر، زۆر بە دڵسۆزییەوە بەدەم كێشەكانی خەڵكەوە دەچوو، زۆر پڕۆژەی هەبوون بۆ پێشخستنی زیاتری شاری هەولێر و هەموو ناوچەكانی پارێزگای هەولێر. بەداخەوە مەرگ ڕێگەی نەدا زیاتر خزمەتی هەولێر و كوردستان بكات”.
لەكۆتاییدا نێچیرڤان بارزانی داوا لە خوای مەزن دەكات “گیانی بە بەزەیی و میهرەبانیی خۆی شاد بكات و دڵنەوایی بە هەموو لایەك ببەخشێت، كار و دڵسۆزیی د. فرسەت سۆفی، هەمیشە لە یادی ئێمەدا دەمێنێتەوە”.
