یوسف كلابی ئەندامی لیژنەی نەزاهەی پەرلەمانی عیراق دەڵێت “قسەكانی ئەحمەد مولا تەڵاڵ وتەبێژی سەرۆكی ئەنجومەنی وەزیران لەسەر پابەندبونە داراییەكانی هەرێمی كوردستان ورد نییە و بەهەڵە تێگەیشتوە”، پێشی وایە عادل عەبدولمەهدی سەرۆك وەزیرانی پێشوو سەرجەم یاساكانی لە بەرژەوەندی كورد پێشێلكردوە.
یوسف كلابی لە بەرنامەیەكی تەلەفزیۆنیدا وتی “رێككەوتن لەگەڵ هەرێمی كوردستان دەربارەی وردەكاری حساباتەكان و رادەستكردنی نەوت بو بەشێوەیەك لە 250 هەزار بەرمیلی رۆژانە كەمتر نەبێت، هەناردەی نەوت لەلایەن هەرێمەوە دوو زیانی لە عیراق داوە، یەكەمیان ئەوەیە داهاتەكەی نادرێت بە ناوەند، دووەمیش ئەوەیە لەسەر پشكی عیراق لە رێكخراوی ئۆپێك حسابە”.
باسی لەوەشكردوە، لەساڵی 2018 و لەكاتی پێشوازیكردن لە وەزیری دارایی وتی، لەسەر داوای عادل عەبدولمەهدی سەرۆك وەزیرانی ئەوكات پارە دەداتە هەرێم، سەرەڕای ئەوەی هەرێم یەك بەرمیل نەوتی رادەستنەكردوە، بۆیە عادل عەبدولمەهدی سەرجەم یاساكانی لە بەرژەوەندی هەرێم پێشێلكرد.
كلابی هێمای بۆ ئەوەشكردوە، بەپێی راپۆرتەكانی ئەو لیژنەیەی حەیدەر عەبادی سەرۆك وەزیرانی پێشو پێكیهێنا، زیانی عیراق لە هەناردەكردنی نەوتی كەركوك لەلایەن هەرێمەوە لە سەردەمی داگیركاری داعشدا 128 ملیار دۆلار بوە، لیژنەكە راپۆرتەكەی ناردوەتە نوسینگەی عادل عەبدولمەهدی، بەڵام راپۆرتەكە بێسەروشوێن بو.
ئەو پەرلەمانتارە پێشی وایە: قسەكانی ئەحمەد مولا تەڵاڵ وتەبێژی سەرۆك وەزیران دەربارەی پابەندبونە داراییەكانی هەرێم پێش ناردنی موچە ناواقیعیە و ورد نییە، بۆیە داوای لێدەكەین لە داهاتودا لەو مەلەفانەدا پەیوەندی بە داهاتی خەڵكەوە هەیە، ورد بێت، بەپێی تێگەیشتنمان قسە لەبەردەمیدا كراوە، بەڵام ئەو بە هەڵە تێگەیشتوە.
