ئەسوان كلدانی ئەندامی لیژنەی پەیوەندییەكان و راگەیاندنی پەرلەمانی عیراق ئاشكرایكرد، دادگا ماوەی 30 رۆژی داوە بە كۆمپانیاكانی پەیوەندی مۆبایل بۆئەوەی قەرزەكانی سەریان رادەستی حكومەت بكەن.
ئەسوان كلدانی لەلێدوانێكی رۆژنامەوانیدا وتی “دوای بڕیاری دادگا بۆ رەتكردنەوەی نوێكردنەوەی گرێبەستی كۆمپانیاكانی پەیوەندی مۆبایل لە عیراق، پێویستە ئەو كۆمپانیایانە قەرزەكانی سەریان رادەستی حكومەت بكەن”.
هەروەها لەبارەی قەرزەكانی پێشو، كە سكاڵاكە یەكلایی نەكردوەتەوە، ئەو پەرلەمانتارە دەڵێت “پێویستە لە دادگادا یەكلاییبكەنەوە و لەماوەی 30 رۆژدا ئەو پارانە رادەستی حكومەت بكەن”.
ئەسوان كلدانی پێیوایە، ئەو كۆمپانیایانە چەندین ساڵە خۆیان لە دانی باج و قەرزەكانی سەرشانیان دەدزنەوە، كە گەیشتوەتە نزیكەی یەك ملیار دۆلار، گوشارە سیاسییەكانی ئەو كۆمپانیایانەش بۆ دواخستنی دانەوەی قەرز و باجەكانی سەریان بوە.
ئەو پەرلەمانتارە جەختیشلەوەدەكاتەوە، عیراق تاكە وڵاتی جیهانە كۆمپانیاكانی پارەیان لەسەر كۆدەبێتەوە و نایدەن، لەكاتێكدا لە وڵاتانی دیكە كۆمپانیاكان قەرز دەدەن بە حكومەتەكانیان بۆ ماوەیەكی درێژ و حكومەت لە 10 بۆ 15 ساڵدا دەیانداتەوە.
