ئەندامێكی لیژنەی دارایی پەرلەمان عیراق رایدەگەیەنێت، حكومەتی هەرێم، ژمارەی جیاواز و دوور لە راستی فەرمانبەرانی رادەستی بەغدا دەكات و دەیانگەیەنێتە دوو هێندە، كە لەراستیدا رەنگە 600 هەزار فەرمانبەر لە هەرێم بوونی هەبێت.
لە لێدوانێكی رۆژنامەوانیدا عەبدولهادی سەعداوی، ئەندامی لیژنەی دارایی لە پەرلەمانی عیراق، رایگەیاند، “حكومەتی فیدراڵ داوای لیستی ژمارەی فەرمانبەرانی لە هەرێم كردووە، تا رادەستی وەزارەتی دارایی عیراقی بكات”.
وتیشی: “حكومەتی هەرێم بەپێی ئەو لیستانەی پێشكەشی كردووە، ژمارەی فەرمانبەرانی دەگاتە ملیۆنێك و 250 هەزار فەرمانبەر، بەڵام ئەو ژمارەیە دوورە لە راستییەوە و پێدەچێت 600 هەزار فەرمانبەر لە هەرێم بوونی هەبێت”.
بەوتەی سەعداوی، “كێشەكە لەوەدایە، حكومەتی فیدراڵ كاتێك بودجەی ساڵانە بۆ مووچە دادەنێت، پشت بە ژمارەی فەرمانبەران نابەستێت، بەڵكو پشت بە رێژەی سەدی دەبەستێت و ئەوەش دەبێتە هۆی ئەوەی حكومەتی هەرێم بە ئارەزووی خۆی هەڵسوكەوت بكات”.
