فراكسیۆنی گۆڕان لە پەرلەمانی عیراق پشتیوانی لە قسەكانی مستەفا كازمی دەكات بەوەی، موچەی فەرمانبەرانی هەرێم بە دوور بێت لە ململانێ سیاسییەكان، بە هەڵوێستێكی بەرپرسانەی وەسفدەكات، داواشدەكەن كاروباری دارایی هەرێم لە چوارچێوەی یاسای بودجە رێكبخرێت و دەسەڵاتدارانی هەرێم دەستهەڵگرن لە قوماركردن بە چارەنوسی خەڵكی كوردستان.
لە راگەیەندراوێكدا فراكسیۆنی گۆڕان لە پەرلەمانی عیراق دەڵێت، پشتیوانی لە هەڵوێستی بەرپرسیارانەی مستەفا كازمی سەرۆك وەزیرانی عیراق دەكەن لە بەدوورگرتنی موچەی موچەخۆرانی هەرێم لە ململانێ سیاسییەكان، دوپاتیدەكەنەوە، سیاسەتی برسیكردنی هاوڵاتیانی ئاسایی و كێشەدروستكردن بۆ ژیانیان بەهۆی كێشە سیاسی و داراییەكان، نادەستوری و نایاساییە.
فراكسیۆنی گۆڕان داواش لە دەسەڵاتدارانی هەرێم دەكات، پابەند بن بەو رێككەوتنانەی لە نێوان هەرێم و بەغدا ئەنجام دراون، بە زوترین كات بگەڕێنەوە بۆ دانوستانەكانیان لەگەڵ حكومەتی فیدراڵی بۆ گەیشتن بە چارەسەری دوورمەودا و یاسایی جدی سەبارەت بە كەرتی نەوت و گاز، دەروازە سنورییەكان و داهاتە نانەوتییەكانی تر، بە شێوەیەك كە لەسەر بنەمای دەستور، ماف و پابەندیی هەر لایەك دیاریبكرێت و پابەند بن پێوەی.
فراكسیۆنەكە راشیگەیاندوە، “ئێستا كاتیەتی، كە كاروباری دارایی هەرێم لە چوارچێوەی یاسای بودجە رێكبخرێت، رێككەوتنە نهێنییەكانی پەیوەندیدار بە بواری نەوت و گاز ئاشكرا بكرێن، بەتایبەت رێككەوتنی رانەگەیەندراو لەگەڵ توركیا كە بە “رێككەوتنی پەنجا ساڵە” ناودەبرێت، هەروەها كاتیەتی دەسەڵاتدارانی هەرێم دەستهەڵگرن لە قوماركردن بە چارەنوسی خەڵكی كوردستان و ماف و دەستكەوتەكانی”.
