جۆ بایدن سەرۆكی هەڵبژێردراوی ئەمریكا لەسەر دوو كەس یەكلابوەتەوە بۆ وەرگرتنی پۆستی وەزیری داهاتووی دەرەوەی ئەمریكا.
ئاژانسی هەواڵی ئەسۆشیەیتد پرێس لە سەرچاوە ئاگادارەكانەوە بڵاویكردووەتەوە، جۆ بایدن بڕیاریداوە لە ئیدارەكەیدا یەكێك لە “ئەنتۆنی بلینكن”، یان سیناتۆر “كریس كۆنز” پۆستی وەزیری دەرەوەی ئەمریكا وەربگرن.
بەپێی هەواڵەكەی ئەسۆشیەیتد پرێس، ئەو دوو كاندیدە بوونەتە ركابەری كۆتایی بۆ وەرگرتنی پۆستی وەزیری داهاتووی دەرەوەی ئەمریكا، هەردووكیشیان ویستی وەرگرتنی پۆستەكەیان نیشانداوە.
بلینكن راوێژكاری یەكەمی بایدن بوو بۆ كاروباری پەیوەندییەكانی دەرەوە لە تیمی هەڵبژاردنەكەیدا، كۆنز-یش سیناتۆرە لە ئەنجومەنی پیران، سەرچاوەكان پێیان وایە ئەنتۆنی بلینكن چانسی زیاترە بۆ بوونە وەزیری دەرەوە، ئەسۆشیەیتد پرێس دەڵێت، پێدەچێت ئەم هەفتەیە بایدن پۆستەكە یەكلابكاتەوە، بەڵام رۆژنامەی “هێڵ”ی ئەمریكی لەسەر هەمان پرس هەواڵێكی بڵاوكردووەتەوە و ئاشكرایكردووە، جۆ بایدن یەكلابوەتەوە بەوەی ئەنتۆنی بلینكن بكاتە وەزیری دەرەوە لە كابینەكەیدا.
بلینكن لە كابینەكەی باراك ئۆباماشدا جێگری وەزیری دەرەوە بووە.
