ڕێبوار كه‌ریم ئه‌ندامی ئه‌نجومه‌نی نوێنه‌رانی عێراق چه‌ند زانیارییه‌ك له‌باره‌ی هه‌ڵمه‌تی كۆكردنه‌وه‌ی واژۆ بۆ گواستنه‌وه‌ی مووچه‌ی مووچه‌خۆرانی هه‌رێم بۆ سه‌ر به‌غدا لەڕێی هەژماری بانكییەوە ئاشكرا ده‌كات.
ئه‌و په‌رله‌مانتاره ڕایده‌گه‌یه‌نیت، لە بەرواری (18/6/2020) پڕۆژەی (گواستنەوەی موچەی فەرمانبەرانی هەرێمی كوردستان بۆ سەر حكومەتی عیراقی فیدراڵ)مان لەڕێی كۆنفرانسێكی رۆژنامەوانییەوە لە سلێمانی راگەیاند.
ئه‌و په‌رله‌مانتاره هۆكاری پڕۆژه‌كه‌ی بۆ ئه‌وه گه‌ڕانده‌وه، داخوازیە بەردەوامەی فەرمانبەرانی راستەقینەی هەرێمی كوردستان لەهەموو كەرتەكاندا پێشكەشیان كرد، بەتایبەتی مامۆستایانی ناڕازی و زانكۆو پەیمانگاكان و پزیشكان و سەرجەم فەرمانبەرانی دیكە، وە بەهۆی:
1. بەردەوامی كێشەی موچەی فەرمانبەرانی هەرێمی كوردستان سەرەڕای بونی چەندین سەرچاوەی داهاتی وەك فرۆشتنی نەوتی هەرێم و گومرك و داهاتی ناوخۆو پارەی بەغداد.
2. گەندەڵی بێشوماری سەرچاوەكانی داهات و تەنانەت ونبونی ئەو پارەیەی كە لە حكومەتی عیراقییەوە دەنێردرێت بۆ هەرێم.
3. دواخستن و لێبڕینی بەردەوامی موچەی فەرمانبەران چەندین ساڵە بەردەوامە.
4. خواستی فەرمانبەرانی هەرێمی كوردستان بۆ پێدانی موچەكانیان راستەوخۆ لە حكومەتی عیراقەوە.
ئه‌و قه‌رله‌منتاره ئاشكراشیكرد، “لەم پێناوەشدا، لە بەرواری (27/10/2020) نوسراوێكمان ئاڕاستەی سەرۆكایەتی پەرلەمانی عیراق كرد و خۆشبەختانە تا ئەم ساتە (۱۱۷) ئەندامی بەڕێزی پەرلەمان ئیمزایان لەسەر كردوە و پاڵپشتییەكانیش بەردەوام لە زیادبوندایە.”
ئاماژه‌ی بۆ ئه‌وه‌شكرد، “لەپاڵ ئەمەشدا، توانیمان لەڕێی مامۆستایان و فەرمانبەرانی ناڕازی و تیمە تایبەتەكانی خۆمانەوە تا ئەم ساتە (157422) واژۆی پشتگیری كۆبكەینەوە بەڕێژەی (61.4%) لە پارێزگاكانی هەولێرو دهۆك و (38.6%) لە پارێزگاكانی سلێمانی و هەڵەبجە.”
له درێژه‌ی نووسینه‌كه‌یدا وتیشی: دەمانەوێت ئەوەشتان پێ رابگەیەنین كە خۆشبەختانە پڕۆژەكە ئاڕاستەی تەشریعی خۆی وەرگرتوە لەڕێی ئەو نوسراوەی بەرزمان كردۆتەوە بۆ سەرۆكایەتی پەرلەمان و سەرۆكایەتی پەرلەمانیش ئاڕاستەی لیژنەی تایبەتمەندی كردووە بۆ تەواوكردنی هەموو ڕێوشوێنە یاساییەكان.
