نرخی نەوتی خاو بەردەوامە لە بەرزبونەوە و گەیشتوەتە بەرزترین ئاستی لەماوەی 3 مانگی رابردودا، بەجۆرێك یەك بەرمیل خاوی برێنت لە 45 دۆلار نزیكبوەتەوە.
بەپێی راپۆرتە ئابورییەكان، نرخی نەوتی خاو بەردەوامە لە بەرزبونەوە، بەشێوەیەك لەماوەی هەفتەی رابردودا زیاتر لە 5%ی نرخەكەی زیادیكردوە و سێیەم هەفتەیە لەسەریەك بەرزدەبێتەوە، ئەوەش بەهۆی هەواڵە خۆشەكانەوە لەسەر ڤاكسینی كۆمپانیاكانی “فایزەر”ی ئەمریكی و “بیۆنتیك”ی ئەڵمانی و “مۆدێرنە”ی ئەمریكی بۆ ڤایرۆسی كۆرۆنا هاتوەتەئاراوە.
بەپێی ئەو راپۆرتانە، یەك بەرمیل خاوی برێنت 76 سەنتی تر چۆتە سەر نرخەكەی و گەیشتوەتە 44 دۆلار و 96 سەنت، هەروەها بەرمیلێك خاوی خۆرئاوای تێكساسی ئەمریكا 41 سەنتی دیكە زیادی كردوە و بە 42 دۆلار و 15 سەنتەوە مامەڵەی پێوەدەكرێت.
هەروەها نەوتی تێكەڵەی خاوی رێكخراوی ئۆپێكیش، نرخی یەك بەرمیلی گەیشتوەتە 43 دۆلار و 12 سەنت.
