مایك پۆمپیۆ وەزیری دەرەوەی ئەمریكا رایگەیاند، بوونی هێزەكانیان لە عێراق، بۆ پاڵپشتیكردنە لە حكومەتی عێراق بە سەرۆكایەتی مستەفا كازمی.
پۆمپیۆ لەچوارچێوەی سەردانەكەیدا بۆ ئیمارات لەلێدوانێكی رۆژنامەوانییدا باسی لە پێشهاتەكانی عیراق كرد و رایگەیاند، ئەمریكا هەوڵدەدات سەقامگیری لەو وڵاتەدا بەرقەرار بێت و وتیشی “بونی هێزەكانمان لەوێ، ئامانج لێی پاڵپشتیكردنە لە حكومەتی عیراق بە سەرۆكایەتی مستەفا كازمی”.
هەروەها وەزیری دەرەوەی ئەمریكا رایگەیاند، لە رۆژانی داهاتودا، ئەو رێوشوێنانە رادەگەیەنن، كە دژبە میلیشیاكانی سەربە ئێران لە عیراقدا دەیانگرنەبەر.
سەرەتای ئەم هەفتەیە لیوا تەحسین خەفاجی وتەبێژی فەرماندەیی ئۆپەراسیۆنە هاوبەشەكانی عیراق رایگەیاند، بەپێی ئەو رێككەوتنەی لە چوارچێوەی گفتوگۆی ستراتیژیی نێوان بەغدا و واشنتۆن كراوە، 500 سەربازی ئەمریكا لە هەنگاوی یەكەمدا لە عیراق دەكشێنەوە.
