نێچیرڤان بارزانی سەرۆكی هەرێمی كوردستان لە رۆژی جیهانیی نەهێشتنی توندتیژی دژی ژناندا پەیامێكی بڵاوكردەوە و تێیدا دەڵێت “ئافرەتان لە ماڵ و نەخۆشخانە و دامەزراوە تەندروستی و پەروەردەیییەكان، ئەركێكی قورسیان كەوتە ئەستۆ”.
ئەمەش دەقی پەیامەكەی سەرۆكی هەرێمە:
لە ساڵیادی ڕۆژی جیهانیی نەهێشتنی توندوتیژیی دژی ژناندا، جەخت لە بەردەوامیی پشتگیری لە مافەكانیان و هەوڵ و كاری بەردەوام بۆ نەهێشتنی توندوتیژیی دژی ژنان دەكەینەوە. كوردستانیش وەك هەموو جیهان بەهۆی ڤایرۆسی كۆرۆناوە، قۆناغێكی زۆر سەخت تێدەپەڕێنێت. ئافرەتان لە ماڵ و نەخۆشخانە و دامەزراوە تەندروستی و پەروەردەیییەكان، ئەركێكی قورسیان كەوتە ئەستۆ.
ژنان لە بەرەی پێشەوەی خەبات بوون بۆ پەروەردەی منداڵ و پاراستنی هاووڵاتیان و ڕێگری لە بڵاوبوونەوەی پەتا و چارەسەركردنی نەخۆش. دەستخۆشی لە پەرستار و پزیشك و كرێكار و كارمەندانی تەواوی دامەزراوە تەندروستی و پەروەردەیییەكانی كوردستان و سوپاسی ئەرك و ماندووبوونیان دەكەم.
قەیرانی ئابووری و دارایی كە لێكەوتەی پەتای كۆڤید_19ن، لەگەڵ گرژییە سیاسییەكان، دەستكەوتەكانی ژنان دەخەنە مەترسییەوە، بەڵام ئافرەتانی كوردستان دڵنیا دەكەینەوە كە لەگەڵ لایەنە پەیوەنددارەكانی حكوومەتی هەرێمی كوردستان كار دەكەین بۆ پاراستی دەستكەوتەكانیان و نەهێشتنی توندوتیژی و مسۆگەركردنی دادوەریی كۆمەڵایەتی. لە هەر شوێن و ئاستێكدا بێت، بەرەنگاری گێچەڵ و دەستدرێژی بۆ سەر ئافرەتان دەبینەوە.
توندوتیژی، پرسی مافی مرۆڤ و هەموو كۆمەڵگەیە. پێویستە پیاوان ڕۆڵی كاراتر ببینن، بەشێكی گەورەی چارەسەر بن و ڕۆڵیان لە نەهێشتنی توندوتیژیدا هەبێت. كاتی كەرەنتینە و ڤایرۆسی كۆرۆنا، بۆ پیاوان بووە مایەی هۆشیاری و بەخۆداچوونەوە كە ناوماڵ تەنها شوێنی حەسانەوە نییە، بەڵكوو شوێنی كار و هاوكاری و بەجێهێنانی ئەركەكانیشمانە بەرامبەر دایك و خوشك و هاوژین و پەروەردەی منداڵەكانمان.
ئێمە لە سەرۆكایەتیی هەرێمی كوردستان هەماهەنگی و هاوكاری لەگەڵ حكوومەت دەكەین بۆ پاراستنی مافەكانی ژنان و بەرەنگاربوونەوەی توندوتیژی لەسەر بنەمای جێندەر، هەروەها هانی كۆمەڵگەی نێودەوڵەتی دەدەین كە بۆ ئەم پرسە بە گوڕ و تینێكی زیاترەوە پشتگیریی دامودەزگاكانی هەرێمی كوردستان بكەن. ئافرەتان دڵنیا دەكەینەوە كە هاوكاری و هەماهەنگیمان بۆ گەیشتن بە ئاكامی باشتر بەردەوام دەبێت.
هیوادارم چالاكی و كارەكان تەنها لەم شازدە ڕۆژەدا قەتیس نەمێنن، بەڵكوو هەمووان پێكەوە بە ژن و پیاوەوە ڕۆژانە كار بۆ نەهێشتنی توندوتیژی و بەدیهێنانی ئامانجەكانمان بۆ ئاشتی و یەكسانی و دادوەری، بكەین.
هیوای سەركەوتن و تەندروستی بۆ هەموو لایەك دەخوازم.
نێچیرڤان بارزانی
سەرۆكی هەرێمی كوردستان
25-11-2020
