ژمارەی توشبوانی ڤایرۆسی كۆرۆنا بەرەو 61 ملیۆن كەس هەنگاو دەنێت و لە ئەڵمانیاش ژمارەی گیانلەدەستدان زۆر بەرزدەبێتەوە.
بەگوێرەی ماڵپەڕی worldometers لەگەڵ ئەوەی دوێنێ ژمارەی توشبوان گەیشتە 60 ملیۆن، بەڵام بەشێوەیەكی چاوەڕواننەكراو ئەمڕۆ ژمارەكە گەیشتوەتە سەروو 60 ملیۆن و 721 هەزار توشبو.
لە بەرانبەر بەرزبونەوەی ژمارەی توشبوان، ژمارەی چاكبونەوەش زیاتر بوە و گەیشتوەتە سەروو 42 ملیۆن و 32 هەزار كەس.
لەگەڵ ئەوەشدا، تائێستا زیاتر لە ملیۆنێك و 426 هەزار كەس بەهۆی كاریگەری ڤایرۆسەكە لەسەریان، گیانیانلەدەستداوە.
لەلایەكی دیكەوە، رۆژی چوارشەممە ئەنگێلا مێركل راوێژكاری ئەڵمانیا لەگەڵ حاكمی ویلایەتەكانی وڵاتەكەی كۆبۆتەوە و رێككەوتون لەسەر درێژكردنەوە و توندتركردنەوەی رێوشوێنەكانی دژبە بڵاوبونەوەی ڤایرۆسی كۆرۆنا.
ئەو رێوشوێنانە بەلانی كەمەوە تا 20ی مانگی داهاتو بەردەوام دەبن، رەنگە لە مانگی 1ی ساڵی داهاتوشدا بەردەوام بن، چونكە وەك مێركل دەڵێت “جارێ ناتوانرێت پێشبینی ئەوەبكرێت كەی ژمارەی توشبوان بە كۆرۆنا كەمدەبێتەوە و بەهۆیەوە رێوشوێنەكان لاببرێن”.
ئەو ترسەی لە ئەڵمانیادا هەیە پەیوەندی بە داتاكانی توشبوان و مردن هەیە بە ڤایرۆسەكە، لەكاتێكدا ژمارەی توشبوان گەیشتوەتە سەرو 983 هەزار كەس، 15 هەزار و 381 گیانلەدەستدانیش تۆماركراوە، بەجۆرێك لە 24 كاتژمێری بەرلە كۆبونەوەكەی دوێنێی مێركل و حاكمی ویلایەتەكانی ئەڵمانیا، 410 حاڵەتی مردن بە كۆرۆنا هەبوە.
