ڕۆژانە نزیكەی ١٧ سەعات كارەبای نیشتمانی بۆ هاووڵاتیان دابینكراوە

وەزارەتی كارەبای هەرێم ڕایگەیاند، لە ئێستادا ڕۆژانە نزیكەی ١٧ سەعات كارەبای نیشتمانی بۆ هاووڵاتیان دابینكراوە.
“ئومێد ئەحمەد” وتەبێژی وەزارەتی كارەبای هەرێم ڕایگەیاند، بەهۆی ئەو چاكسازییانەی لە كەرتی كارەبای هەرێمدا كراوە، توانراوە بڕی پێدانی كارەبای نیشتمانی لە وەرزی سەرمادا زیاد بكرێت، بە شێوەیەك لە ساڵی ٢٠٠٣وە تا ئێستا بۆ یەكەمجارە بتوانرێت ڕۆژانە نزیكەی ١٧ سەعات كارەبا بۆ هاووڵاتیان دابین بكەن.
جەختیشیكردەوە، تا ناوەڕاستی مانگی تشرینی دووەم نزیكەی ٢٢ سەعات كارەبای نیشتمانی دابینكراوە، لەو وادەیەش بە دواوە تا ئێستا ڕۆژانە نزیكەی ١٧ سەعات كارەبا دابینكراوە.
وتەبێژی وەزارەتی كارەبای هەرێم ئاماژەی بۆ ئەوەشكرد، زیادبوونی بڕی پێدانی كارەبا پەیوەندی بە پڕۆژە چاكسازییەكانی وەزارەتی كارەباوە هەیە، ئەگەر چاكسازییەكانیش بەردەوام بن، دەتوانرێت بڕی پێدانی كارەبای نیشتمانی زیاتر بكرێت.