دوای كۆبونەوەكەی ئەمڕۆی یەكێتی و گۆڕان، راگەیەندراوێكیان بڵاوكردەوە و بە پێویستی دەزانن، “بەپەلە وەفدێكی خاوەنبڕیاری حكومەتی هەرێم بۆ پرسی موچە، بچێتە بەغدا”، پێشوازیش لە “هەنگاوەكانی بەرەوپێشچوونی سیستمی لامەركەزی كارگێڕی و دارایی” دەكەن.
دەقی راگەیەندراوی كۆبونەوەكەی ئەمڕۆی یەكێتی و گۆڕان :
ئەمڕۆ یەکشەمە 29-11-2020 کۆبوونەوەی لوتکەی یەکێتیی نیشتمانیی کوردستان و بزووتنەوەی گۆڕان لەدەباشان بەڕێوەچوو.
تەوەری سەرەكی كۆبوونەوەكە گفتوگۆكردن بوو ، لەسەر دواین گۆڕانكاری و پێشھاتە سیاسی و ئابوورییەكانی ھەرێم و عێراق ، بەتایبەت خراپی بژێوی ژیانی ھاوڵاتیان و مووچەخۆرانی ھەرێم ، كە بەرئەنجامی قەیرانی دارایی و بڵاوبوونەوەی ڤایرۆسی كۆرۆنا دروست بووە ، دواتریش بەدیاركراوی دوای دەركردنی یاسای ئەنجومەنی نوێنەرانی عێراق ، پەیوەندیدار بە كورتھێنانی بودجەو وەرگرتنی قەرز قەیرانەكە قوڵتربووەتەوە .
سەڕەڕای جەختكردنەوە لەتوندوتۆڵكردنی پەیوەندی نێوان ھەردوولا، بەپێویست زانرا ھەنگاوی كرداری خێرا بۆ چارەسەركردنی كێشەكان بنرێت، ھەروەك ھاوڕابووین لەسەر ئەم بڕیارانەی خوارەوە:
1 . بەپەلە وەفدێكی خاوەن بڕیاری حكومەتی ھەرێم پێكبھێنرێت و بچێتە بەغدا بۆ گفتوگۆكردن لەسەر چارەسەركردنی ریشەیی و كۆتایی كێشەی بودجەو موچەی ھەرێمی كوردستان ، لەھەمانكاتدا ئەم ھەنگاوە ببێتە بناغەیەكی پتەو بۆ یاسای بودجەی ٢٠٢١ فیدڕاڵی.
2. پێشوازی لەھەنگاوەكانی بەرەوپێشچوونی سیستمی لامەركەزی كارگێڕی و دارایی دەكەین، ھەروەك لەكارنامەی كابینەی نۆیەمی حكومەتی ھەرێمدا ھاتووە
3. زەمینەخۆشكردن بۆ كۆبوونەوەی لایەنە سیاسیەكانی كوردستان و پەرەپێدانی پەیوەندییەكان بە مەبەستی چارەسەركردنی ئەو كێشانەی رووبەڕووی واقیعی ھەرێم و عێراق دەبێتەوە.
یەكێتیی نیشتمانیی كوردستان بزووتنەوەی گۆڕان
