ئێران، لە خزمەتی ئەو بارە ترانزێتانەی دێنە هەرێمی كوردستانەوە، بڕیارێكی دا.
لەماوەی رابردوودا هەر بارێكی ترانزێت، كە لە خاكی ئێرانەوە دەهاتە هەرێمی كوردستان، بەبیانوی رێگاوبان، بڕی 50 دۆلار بۆ هەر بارێك وەردەگیرا، بۆیە بازرگانانی هەرێمی كوردستان نیگەران بوون و داوایان لە ژووری بازرگانی و پیشەسازیی سلێمانی كردبوو كاربكات بۆ لابردنی وەرگرتنی ئەو 50 دۆلارە.
سیروان محەمەد سەرۆكی ژووری بازرگانی و پیشەسازیی سلێمانی ئاشكرایكردووە، دوای نیگەرانییەكانی بازرگانان و داواكردنیان بۆ لابردنی ئەو 50 دۆلارە، “هەوڵەكانمان چڕكردەوە و لەگەڵ لایەنی پەیوەندیدار و یەكێتیی ژوورە بازرگانیەكانی عێراق دەستمان بە گفتوگۆ كرد دەربارەی ئەو پارەیە، خۆشبەختانە یەكێتیی ژوورە بازرگانیەكانی عێراق ئاگاداریان كردینەوە لەوەی چیتر ئەو پارەیە لە بارە ترانزێتەكان وەرناگیرێت”.
سەرۆكی ژووری بازرگانی و پیشەسازیی سلێمانی ئاماژەی بەوەشدا، زیادكردنی هەر بڕە پارەیەك لەسەر كاڵا و شتومەك لەكاتی هاوردەكردندا، كاریگەری لەسەر نرخ دەبێت لەبازاڕەكاندا و هاووڵاتیان بە نرخێكی گران دەگات بەدەستیان، بۆیە پێویستە هەموو ئەو رێگرییانە لاببرێت، كە بۆ كاری بازرگانی دروست دەكرێت.
باری ترانزێت ئەو بارانە دەگرێتەوە، كە لە وڵاتانی دیكەوە بەخاكی ئێراندا دەگاتە هەرێمی كوردستان.
