جەمال كۆچەر ئەندامی لیژنەی دارایی پەرلەمانی عیراق دەڵێت “تائێستا هیچ رێنماییەك نییە لەلایەن حكومەتەوە بۆ كەمكردنەوەی دەرماڵەی فەرمانبەران لە ساڵی داهاتودا”.
جەمال كۆچەر لەلێدوانێكدا بۆ رۆژنامەی “سەباح”ی نیمچەفەرمی وتویەتی “هیچ زانیاریەك نییە سەبارەت بە كەمكردنەوەی دەرماڵەی فەرمانبەرانی حكومەت لە پرۆژەیاسای ساڵی داهاتودا و حكومەت هیچ شتێكی لەوبارەیەوە پێشكەش نەكردوە”.
باسی لەوەشكردوە، تێپەڕاندنی یاسای خزمەتگوزاری مەدەنی، كاری فەرمانبەران بەشێوەیەكی گەورە رێكدەخات، چونكە دەبێتە دامەزراوەیەك بۆ كۆكردنەوەی سەرجەم فەرمانبەرانی دەوڵەت لەیەك دامەزراوەدا و ئامانجی ئەنجومەنی خزمەتگوزاری-یش دانانی پێودانگ و دەرماڵەیەكی یەكگرتوە.
ئەو پەرلەمانتارە هێمای بۆ ئەوەكردوە، جیاوازییەكی زۆر لەنێوان بەڕێوەبەرایەتییەك بۆ بەڕێوەبەرایەتییەكی تر لە دابەشكردنی دەرماڵەدا هەیە و ئەوەش نادادپەروەرییە، بۆیە دابەشكردنی دەرماڵە بە یەكسانی یارمەتیدەر دەبێت بۆ حكومەت تا ئاسانتر گواستنەوەی فەرمانبەر لەنێوان بەڕێوەبەرایەتییەكاندا ئەنجامبدات، بۆیە پێویستە ئەو جیاوازییە لاببرێت.
