wazho.net
بۆ هەڵسەنگاندنی رەوشی بڵاوبونەوەی كۆرۆنا و تاووتوێكردنی رێوشوێنەكان، لیژنەی باڵای بەرەنگاربونەوەی كۆرۆنا كۆدەبێتەوە و بڕیار لە پرۆسەی خوێندنیش دەدرێت.
بەگوێرەی زانیارییەكان، كۆبونەوەكە كاتژمێر 2ی پاشنیوەڕۆ بە سەرپەرشتی رێبەر ئەحمەد وەزیری ناوخۆی حكومەتی هەرێم لە شاری هەولێر بەڕێوەدەچێت و بەرپرسانی وەزارەتە پەیوەندیدارەكان، پارێزگارەكان و سەرپەرشتیاری ئیدارە سەربەخۆكان ئامادە دەبن.
كۆبونەوەكەی ئەمڕۆ لەكاتێكدایە بەگوێرەی ئەو داتایانەی وەزارەتی تەندروستیی هەرێم رۆژانە بڵاویدەكاتەوە، ژمارەی توشبوانی ڤایرۆسی كۆرۆنا دابەزیوە و لە كۆبونەوەكەدا ئەو رەوشە نوێیە تاووتوێ دەكرێت، سەرەڕای دەركردنی بڕیاری نوێ لەبارەی دەستپێكردنەوە یاخود دواخستنی پرۆسەی خوێندن.
هەرچەندە زۆربەی سێكتەرەكان كەوتونەتەوە كار، بەڵام پرۆسەی پەروەردە و فێركردن لە هەرێمی كوردستان زەرەر و زیانێكی زۆری بەركەوتوە و دواخستن و بایكۆتی پرۆسەكە وایكردوە تائێستا، جگە لە قوتابخانە ئەهلییەكان، كە هەندێكیان دەوام دەكەن، قوتابیان و خوێندكاران لە ماڵەوەن و ناچنەوە ناوەندەكانی خوێندن. پێشبینیش دەكرێت تا كۆتایی ئەمساڵ رەوشەكە وەك ئێستا بەردەوام بێت و دەرگای قوتابخانە و خوێندنگەكان نەكرێنەوە.
