میدیاكانی ئەمریكا دەڵێن، لە كۆبونەوەی وەزیرانی دەرەوەی هاوپەیمانێتیی ناتۆدا، دەمەقاڵێ لەنێوان هەریەكە لە پۆمپیۆ و چاوشئۆغلو روویداوە، ئەندامانی ناتۆ پشتگیرییان لە قسەكانی وەزیری دەرەوەی ئەمریكا كردووە.
بەپێی هەواڵی میدیا ئەمریكییەكان، لە كۆبوونەوەی وەزیرانی دەرەوەی هاوپەیمانێتیی ناتۆدا، كەبەشێوەی ڤیدیۆ كۆنفرانس بەڕێوەچووە، مایك پۆمپیۆ وەزیری دەرەوەی ئەمریكا، توركیای بە هۆكاری دروستبوونی ئاڵۆزی و ململانێ لە رۆژهەڵاتی دەریای ناوەڕاست تۆمەتبار كردووە، بەهۆی جموجوڵەكانی بۆ گەڕان بەدوای وزەدا، هەروەها رەخنەی ئەوەی لە ئەنقەرە گرتووە، كە بە كڕینی سیستەمی ئێس 400ی روسی، زیانی بە ناتۆ گەیاندووە.
لە بەرانبەردا مەولود چاوشئۆغلو وەڵامی پۆمپیۆی داوەتەوە و ئەمریكای بەوە تۆمەتبار كردووە كە لە جیاتی هاوكاریكردنی توركیا، هاوكاریی هێزە كوردییەكانی رۆژئاوای كوردستانی كردووە، بۆیە دەمەقاڵێ و وەڵام و وەڵامدانەوە لەنێوان هەردوو وەزیرەكە دروستبووە.
میدیاكانی ئەمریكا ئاماژەیان بەوەش كردووە، ئەندامانی ناتۆ لە كۆبوونەوەكەدا پشتیوانییان لە پۆمپیۆ كردووە و دژ بە توركیا قسەیان كردووە، بەتایبەت ژان ئیڤ لۆدریان وەزیری دەرەوەی فەرەنسا.
لە كۆتاییەكانی كۆبوونەوەكەشدا ئەندامانی ناتۆ نوێنەرەكەی توركیایان لە كۆبوونوەكەدا فەرامۆش كردووە و پێشنیازێكی چاوشئۆغڵوشیان بۆ دووبارە دەستێوەردانی ناتۆ لە لیبیا رەتكردووەتەوە و توركیایان بە هۆكاری خراپتركردنی دۆخی لیبیا تۆمەتبار كردووە.
هەروەها ئەندامانی ناتۆ لەبارەی كێشەكانی یۆنان و توركیاوە، دژ بە ئەنقەرە قسەیان كردووە و بە ئاشكرا بەرگرییان لە وەزیری دەرەوەی یۆنان كردووە.
