عەقید واین مارۆتۆ وتەبێژی هاوپەیمانێتیی نێودەوڵەتی دژبە داعش پێیوایە كشانەوەی بەشێك لە هێزەكانی ئەمریكا كاریگەری ئەوتۆی نابێت لەسەر ئەركەكانی هاوپەیمانێتییەكە لە عیراقدا.
مارۆتۆ لەلێدوانێكی رۆژنامەوانیدا باسی لەوەكردوە، هاوپەیمانێتیی نێودەوڵەتی لە رێگەی زانیاریی هەواڵگری و پاڵپشتی لۆجیستی و دابینكردنی پاڵپشتی ئاسمانی بۆ هێزە هاوپەیمانەكانی، لە كارەكانی بەردەوام دەبێت.
بەگوێرەی داتاكانیان، هاوپەیمانێتییەكە راهێنانی بە زیاتر لە 240 هەزار ئەندامی هێزە ئەمنییەكانی عیراق كردوە، كە بە زۆرباش وەسفی دەكەن و پێیانوایە دەتوانن كارەكانیان وەك پێویست ئەنجامبدەن.
وتەبێژی هاوپەیمانێتیی نێودەوڵەتی جەختلەوەشدەكاتەوە، كشانەوەی بەشێك لە هێزەكانی ئەمریكا لە عیراق كاریگەری زۆر كەمی لەسەر ئەركەكانی هاوپەیمانێتییەكە دەبێت.
