ئەحمەد كنانی ئەندامی پەرلەمانی عیراق رایدەگەیەنێت، لەسەركارلابردنی مستەفا كازمی بەندە بە رەزامەندی كوتلە سیاسییەكانەوە. داواش دەكات بۆ لێپرسینەوە بانگهێشتی پەرلەمان بكرێت.
پەرلەمانتارەكەی عیراق لەلێدوانێكی رۆژنامەوانیدا باسی لەوەكردوە، لەسەركارلابردنی حكومەتی ئێستا پێویستی بە رەزامەندی كوتلە سیاسییەكان هەیە، دەشڵێت “حكومەت جگە لە لێدوانی رۆژنامەوانی هیچ چارەسەرێكی تری پێ نییە”.
بەبۆچونی ئەو پەرلەمانتارە، كابینەكەی كازمی توانای ئەوەی نییە رێگە لە فراوانبونی شكستەكانی لەناو حوكمڕانیدا بگرێت.
كنانی داواش لە سەرۆكایەتی پەرلەمان دەكات، بەهۆی شكستە بەردەوامەكانی حكومەتەكەی، كاتێك دیاری بكەن بۆ بانگهێشتكردن و لێپرسینەوە لە مستەفا كازمی سەرۆك وەزیران.
