گۆڤاری “تایم”ی ئەمریكی بڵاویكردوەتەوە، ئەمساڵ (2020) خراپترین ساڵ بوە لە مێژوی مرۆڤایەتیدا، بەڵام هیوایەك هەیە بۆ باشبوونی ساڵی داهاتو.
گۆڤاری “تایم” بڵاویكردوەتەوە، بارودۆخی پەتای كۆرۆنا و خۆپیشاندانەكان و دوبارەبونەوەی كارەساتە ژینگەییەكان، دەرخەری ئەوەیە مرۆڤ تا چ ئاستێك ژینگەی تێكداوە، بۆیە ساڵی 2020 خراپترین ساڵە، كە مرۆڤایەتی تێیدا ژیابێت.
لەگەڵ ئەو رەوشە خراپەی ئەمساڵ، گۆڤارەكە هیوایەك دەبینێت بۆ ساڵی داهاتو، پێیوایە ژیان هەمیشە پرشنگدار نییە و هەندێكجار پێویستیمان بەوەیە بە كاتژمێرە تاریكەكاندا تێپەڕین.
خوێنەرێكی زۆری گۆڤارەكە لە تۆڕە كۆمەڵایەتییەكاندا رەخنەی توندیان ئاراستەی كردوە و پێیانوایە، ژیان لە ماڵەوە بۆ چەند مانگێك بە شەڕە گەورەكان بەراورد ناكرێت، كە جیهان لە سەدەی 20دا بەخۆیەوە بینیویەتی.
