ئیحسان عەبدولجەبار وەزیری نەوتی عیراق دەڵێت “نرخی نەوت لە گەشەسەندندایە، سیاسەتی دەوڵەتیش هەنگاو بەرەو پشتگیریكردنی كەرتی غاز و وەبەرهێنان لەو كەرتەدا دەنێت.
ئیحسان عەبدولجەبار لە وتەیەكدا لەمیانەی كۆنگرەی نەوت و غاز، كە رۆژی یەكشەممە كارەكانی دەستیپێكرد، وتی “نرخی نەوت دەستیكردوەتەوە بە ساڕێژبونەوە و گەیشتوەتە 49 دۆلار بۆ یەك بەرمیل”.
سیاسەتی دەوڵەتی عیراقیشی رونكردەوە و رایگەیاند، بەرەو كەرتی غاز و وەبەرهێنان لەو كەرتە دەڕۆن، بەڵام خاوبونەوەیەك لە كەرتی غازی عوكازدا هەیە.
وەزیری نەوتی عیراق باسی لەوەشكردوە، دەستوەردان هەیە لە جێبەجێكردنی دەسەڵاتەكاندا و رێگری لەوە دەكرێت قۆناغی پێنجەمی رێگەپێدانەكان لەو كێڵگە غازیەی عوكازدا دەربكرێت.
