عەمید عەلی فەدوی جێگری فەرماندەی گشتی سوپای پاسدارانی ئێران نهێنییەكی دیكەی كوشتنی موحسین فەخریزادە زانای ئەتۆمی وڵاتەكەیان ئاشكرادەكات و دەڵێت “بە چەكی زیرەك تەقەی لێكراوە”
رۆژی 27-11-2020 موحسین فەخریزادە لە ناوچەی دەماوەندی خۆرهەڵاتی تارانی پایتەختی ئێران هێرشیكرایەسەر و كوژرا، لەوبارەیەشەوە جێگری فەرماندەی گشتی پاسداران دەڵێت “ئەو چەكەی تەقەكانی پێكراوە، لە رێی مانگە دەستكردەكان و ئینتەرنێتەوە ئاراستەكراوە و هیچ یەكێك لە تیرۆریستەكان لە شوێنی روداوەكەدا نەبون”.
هەروەها ئەوەشی ئاشكراكردوە، كە 13 گوللـە لە چەكەكەوە تەقێندراوە و بە بەكارهێنانی كامێرای پێشكەوتوی زیرەك، راستەوخۆ ئاراستەی دەموچاوی موحسین فەخریزادە كراوە.
ئاژانسی میهری ئێرانی قسەكانی عەمید عەلی فدوی گواستەوەتەوە و ئاماژەی بەوەشكردوە، 11 پاسەوان لەگەڵ زانا ئەتۆمییەكەدا بون، بەڵام گوللـەكان تەنها ئاراستەی فەخریزادە كراون، لەكاتێكدا هاوژینەكەی 25 سانتیمەتر لە دوریەوە بوە و هیچ گوللـەیەكی بەرنەكەوتوە.
هەروەها ئەوەشی رونكردوەتەوە، سەرۆكی تیمی پاسەوانانی موحسین فەخریزادەش چوار گوللـەی بەركەوتوە، چونكە بە گیانی خۆی زانا ئەتۆمییەكەی پاراستوە.
پاش روداوەكە، راستەوخۆ ئیسرائیل و رێكخراوی موجاهیدینی خەلق-ی بە ئەنجامدەری ئەو هێرشە تۆمەتباركرد و رایگەیاند، شێوازێكی تەواو نوێی تێدا بەكارهێنراوە.
