مەلا بەختیار
نەبونی موچە، تەنگی بە گەلەكەمان هەڵچنیوەو برسێتی خەڵكی راپەڕاندوە. ئەمەش چاوەڕوانكراو بوو!
حكومەتی كوردستان كە لە هەرسێ حیزبە سەرەكیەكەی كوردستان (یەكێتی-پارتی-گۆڕان) پێكهاتوە، تا ئێستا لە كوردستاندا چارەسەری دارایی پێ نییەو عێراقیش چەشنی كوردستان، نوقمی قەیرانە. عێراق (160) ملیار دۆلار قەرزارەو (285) ملیار دۆلاریشی بە گەندەڵی لەدوای روخانی سەدامەوە خوراوە. كوردستانیش (28) ملیار دۆلار قەرزارە؛ بەڵام گەندەڵیەكەی كوردستان وا زیرەكانە دەكرێ، تائێستا پارە دزراوەكە نەخەمڵێنراوە! بەڵام لە ویژدانی رای گشتیدا گومان نەماوە كە گەندەڵی كوردستانی داڕوخاندوە، كەچی بە داخەوە هەتا ئێستاش تاقە گەندەڵكارێكی كەتە نەگیراوە.
چەند رۆژێكە ناخی پڕ لە داخی خەڵك، خرۆشاوە. خۆپیشاندان دەستیپێكردوە. حكومەت دەیەوێت هەر وەكو دۆخی 17/ی شوبات و روداوەكانی دوایی، بە زەبری هێز و داخستنی راگەیاندنی بەرهەڵستكار، چارەسەری بكات. بێگومان ئەگەر لە رابوردودا، ئەم سیاسەتە سەریگرتبێ و قوربانیەكانیشی كەم نەبوون. چ قوربانی لاوان چ نوسەران.. بەڵام ئەمجارە هەقوایە، رێگای چارەسەری گونجاو بگیرێتەبەر. كە پێمان وایە لانی كەم حكومەت پێویستە:
یەكەم: تەعدیلی وەزارەت بكات و خۆی بۆ هەڵبژاردنی پێشوەخت ئامادە بكات.
دوەم: لەگەڵ بەغداد بێ دودڵی لەسەر بودجەو موچە رێكبكەوێ و نەوت رادەست بكات.
سێهەم: هێزی تایبەت كۆنتڕۆڵی دەروازە رەسمی و ناڕەسمیەكانی گومرگ بكات. بە چاودێری هاوبەشی حكومەتی عێراق-هەرێم- هێزەكانی بەرهەڵستی كوردستان.
چوارەم: لیژنەی لێكۆڵینەوە بۆ سزادانی تەواوی ئەو جەردەییە دابنرێ.. كە ماوەیەكە بە ئاشكرا ئەنجام دەدرێ.. لەسەرانسەری دەروازە سنوریەكان!
پێنجەم: كۆنگرەیەكی كوردستانی ببەسترێ بۆ دۆزینەوەی رێگەچارەسەر.. بە مەرجێ، زۆرترین بەشدارانی كۆنگرە، شارەزاكانی لایەنە بەرهەڵستكارەكان بێ..
بۆ ئەوەی خەڵكیش متمانەی هەبێ.. بە زوترین كات، كەناڵی (NRT) ئازاد بكرێتەوە. زیندانی سیاسی كۆتایی بێ. هێزەكانی ئاسایش و پۆلیس تەنها ئەركیان پاراستنی داوودەزگا حكومیەكان بێ و بەس. پێویستیشە خۆپیشاندەران، ماوەی مانگێك مۆڵەت بدەن بە حكومەت و لایەنەكان هەتا ئەو بڕیارانەو بڕیاری پێویستی تر بدەن. لەم مانگەشدا حكومەت موچەی خەڵك بە قەرزی زیاتریش بێ، دابین بكات.
لەكۆتایشدا دەڵێم:
لە (15) ساڵی رابوردودا دەیان جار وتارم نوسیوەو كۆڕم بەستوە. لە زۆربەشیاندا پێشبینی داڕمانی ئابوری كوردستان و تێكچونی دۆخی سیاسیم كردوە. ئێستا لە سایتی (چاودێر) وتارێكی (19/12/2016) بەناونیشانی (گوزەرانی شەهیدان و قەیرانی ئابوری و یەكێتی) بڵاودەكەمەوە، تكایە خوێنەر بیبینێ و بە ویژدان حوكم بدات!
هەروەها پێویستیشە هەموو خۆپیشاندەرە كوژراوەكانی خۆپیشاندانەكان بە هی 17ی شوبات و رۆژانی دوایی و ئەوانەی ئێستاشەوە بە شەهید لەقەڵەم بدرێن.
