سێ سەرۆکایەتییەکەی عێراق لەگەڵ سەرکردەی کوتلە سیاسییە عێراقییەکان کۆبوونەوە، بەپێی راگەیێندراوی ئەنجوومەنی وەزیرانی عێراق بڕیاردراوە کێشەکان لەگەڵ هەرێمی کوردستان بەپشتبەستن بە دەستوور چارەسەربکرێن و درێژە بە گفتوگۆکان بدرێت.
کۆبوونەوەکە لە ئەنجوومەنی وەزیرانی عێراق بەڕێوەچوو، بۆیە لە راگەیێندراوی دوای کۆبوونەوەکەدا حکومەتی عێراق رایگەیاندووە: “لە کۆبوونەوەکەدا کێشە هەڵپەسێردراوەکان لەگەڵ هەرێمی کوردستان باسکران، بەتایبەتی بابەتی بودجە”. ئەنجوومەنی وەزیرانی عێراق جەخت لە درێژەدان بە گفتوگۆکان دەکاتەوە لەگەڵ هەرێمی کوردستان ، کە “بەپشتبەستن بە دەستوور چارەسەربکرێن و چارەسەرێکی دادپەروەرانە بۆ کێشەکان لەگەڵ هەرێمی کوردستان بدۆزرێتەوە”. هەر بەپێی راگەیێندراوەکە، چاکسازیی ئابووری بە “چارەسەرێکی گونجاو” بۆ دەربازبوون لە بارودۆخی دارایی عێراق زانراوە. لە کۆبوونەوەکەدا سەرکردە سیاسییەکان پشتیوانیی خۆیان بۆ چارەسەرکردنی کێشە هەڵپەسێردراوەکانی نێوان حکومەتی فیدراڵی و هەرێمی کوردستان دەربڕی. و جەختیان لەوە کردەوە کە دەبێت بەپێی دەستوور چارەسەر بکرێن. هەروەها لە کۆبوونەوەکەدا مستەفا کازمی، سەرۆکوەزیرانی عێراق دەستپێشخەریی گفتوگۆیەکی نیشتمانیی گشتگیری بۆ زەمینەسازیی سیاسی و کۆمەڵایەتی و ئەمنی بۆ هەڵبژاردنی پێشوەختە راگەیاند کە حکومەت دەیگرێتە خۆی. بۆ ئەوەی هەڵبژاردنی پێشوەختە پاک و ئازادانە بێت و هیچ دەستتێوەردانێکی تێدا نەبێت و ئەوپەڕی ئاستی دادگەری و شەفافیەت بەدیبهێنرێت.
